DILI
- Embaixadór Timor-Leste (TL) ba Cuba, Maubere Lorosa’e da Silva Horta hatete
governu Timor-Leste apoiu pozisaun estadu Timor-Leste nian hodi halo diskusaun
ba fronteira marítima ho Austrália.
“Governu Cuba apoiu pozisaun estadu Timor-Leste ne’e porsentu 100 (100%)
kona-ba kestaun disputa marítima nian,” Lorosa’e informa kestaun ne’e ba
jornalista sira iha Palásiu Prezidensiál, Bairu-Pité, Dili, Tersa (05/04),
hafoin inkontru ho Primeira Dama, Isabel Ferreira.
Nia hatutan embaixadór hotu-hotu ne’ebé ba rai liur ne’e reprezenta estadu
Timor-Leste nian iha rai liur. Tanba ne’e, embaixadór hotu-hotu sei ko’alia
kona-ba kazu fronteira marítima entre Timor-Leste ho Austrália nian, fahe
informasaun ba nasaun sira ne’ebé maka embaixadór sira hela ba.
Lorosa’e esplika Timor-Leste nia pozisaun klaramente lejítima hodi ezije
Austrália para deskuti liña fronteira marítima, tanba ne’e Cuba iha desizaun
absoluta hodi apoiu Timor-Leste.
Hanesan Embaixadór ba Cuba, nia sei fahe informasaun ba nasaun sira ne’ebé
viziñu ho Cuba hodi hatene mós informasaun kona-ba problema disputa tasi entre
Timor-Leste ho Austrália.
“Ha’u sempre iha oportunidade levanta kestaun ne’e ba governu Cubanu inklui
nasaun sira ne’ebé besik Cuba hanesan Jamaika, Mexico no Kostarika hodi ko’alia
kona-ba pozisaun Timor-Leste nian,” nia haktuir.
Hanesan timoroan nia lamenta katak dezde tempu okupasaun Indonézia, Austrália
hatudu nia komportamentu ba Timor ladi’ak. Iha tempu ukun-án mós hautusu
nafatin komportamentu ne’ebé hanesan, hodi halo esplorasaun ba rikusoin iha
tasi Timor.
Dadaun ne’e, xefi misaun ba negosisaun fronteira marítima Timor-Leste ho
Austrália lidera hosi eis Komandante ba Luta Libertasaun Nasionál, Kay-Rala
Xanana Gusmão ne’ebé maka apoiu hosi timoroan hotu para bele rezolve problema
marítima tuir UNCLOS (United Nations Convention on the Law of the Sea).
Austrália
Ignora Soberania TL
Asosisaun
Veteranus Rezisténsia (AVR), apoio totál rezolusaun ne’ebé Parlamentu Nasionál
hasai hodi defende soberani nasaun Timor Leste. Tan ho rezulasaun ne’e, bele
aumenta forsa polítika governu TL hodi defende soberania rasik.
“Nu’udar sidadaun TL, ita hotu iha direitu atu defende soberania nasaun lafaek
ne’e. Tanba, rezolusaun ne’ebé Parlamentu Nasionál hasai, atu defende soberani
nasaun RDTL. Ho ne’e, maske governu Austrália ignora soberania nasaun
Timor-Leste, maibé AVR fiar sei iha solusaun ne’ebé pozitivu ba nasaun TL,”
afirma responsável ACR, Aquilino Guterres ba Timor Post iha Hotel Timor, Tersa
(5/04).
Nasaun RDTL, tuir nia, iha kompozisaun maka lalehan, tasi ho rai. Satán,
nia haktuir, iha tinan 1999, Austrália duni maka lidera misaun Interfet. Ne’e
hatudu Timor-Leste nu’udar nasaun ona ne’ebé iha soberania rasik.
“Bainhira Austrália rekoñese Timor-Leste nu’udar nasaun RDTL, nia mós tenke
rekoñese nasaun ne’e nia soberania kompostu hosi lalehan, tasi, ho rai. Loloos
Austrália labele ignora fali problema fronteira marítima ho TL,” Aquilino
tenik.
“Agora nasaun RDTL iha ona ekipa ida ne’ebé lidera hosi Ministru Planeamentu
Investimentu Estratéjiku (MPIE), Kay-Rala Xanana Gusmão. Tan ne’e, atu infrenta
problema ne’e, timoroan hotu tenke unidade hodi apoiu ekipa ne’e nune’e hetan
lalais solusaun iha prosesu negosiasaun,” nia hatete.
Aleinde ne’e, Sekretáriu Task Force VCLN ba Interese Nasionál, Sergio
Alves subliña, merese duni para Parlamentu Nasionál hasai
rezolusaun ne’e tanba lei fó dalan nune’e hodi defende integridade no soberania
nasaun Timro-Leste nian.
Tuir nia katak Governu Austrália laiha boa vontade di’ak. Maske nune’e, Sergio
hatete, bele Asutrália sai ona hosi lei internasioal UNCLOS maibé iha lei ne’e
rasik loke dalan ba nasaun sira ne’ebé sei disputa fronteira maritíma iha
direitu atu levanta problema refere tuir dalan justisa.
“Agora, ita ko’alia sobre direitu universál, Austrália mós tenke respeitu
Timor-Leste hanesan nasaun soberania. Maibé, ha’u iha esperansa boot katak
posibilidade Timor-Leste manán área disputadu ne’e,” Sergio tenik.(dgx/max)
Timor
Post
Sem comentários:
Enviar um comentário