Dotor Cubano Ida Mate Iha TL, MS: Sentidu Kondelensia Ba Governu Cuba

Governu Timor –Leste liu husi Ministerio Saude (MS) hato’o sentidu kondelensia ba governu Cuba ne’ebe lakon ona sira nia mediku espesialista (bedah) ida ne’ebe durante ne’e dedika nia aan tomak hodi servi povu Timor Leste to’o hakotu iis.

Ministra Saude, Maria do Ceu Sarmento Pina da Costa, hateten governu Timor –Leste sei la husik governu Cuba mesak iha situasaun ida ne’e.

“Lori governu Timor-Leste nia naran hato’o profunda kondolensia no agradesementu kontribuisaun solidaridade, dedikasaun ne’ebe governu Cuba oferese ona ba povu TL liu husi brigada Cuba sira,” Ministra Ceu hato’o, iha Ospital Nasional Guido Valadares.

Nia dehan, hahu tinan 2004 governu Timor –Leste halo kooperasaun ne’ebe espesial tebes ho governu Cuba iha setor saude, liu –liu apoia iha rekursu humanus tanba Timor –Leste sei menus rekursu humanu. 

Nia mos agradese ba Brigada Cuba sira ne’ebe dedika sira nia aan tomak hodi servi povu Timor –Leste iha situasaun triste nia laran. 

Doutor Cubano Joao Carlos Martires Lopes, hakotu iis iha Ospital Nasional Guido Valadares (HNGV), iha domingo (6/3) madrugada, tanba sofre moras atakasaun fuan. 

Entrertantu, Diretor Jeral HNGV), Jose Antonio “Zeto”, hateten matebian hanesan mediku espesialista geral ba sirurgia (bedah) iha HNGV desde tinan 2014. 

“Hau sente lakon tebes ema diak ida hanesan mediku Joao Carlos Martires Lopes (matebian), tanba nia ema ne’ebe badinas, gosta ajuda ema no sai mos konselhor ba iha mediku Timor oan foun sira,” nia hateten. 

Nia hatutan, maske doutor Joao Carlos Martires Lopes matebian ona maibe la fo impaktu ba iha servisu atendementu iha HNGV, tanba brigada Cuba dada hikas fali mediku espesialista sirurgia ida husi Oe-Cusse hodi hein mediku foun. 

“Ne’ebe hau hanoin laiha impaktu, tanba brigade Cuba husu kedas mediku espesialista ida husi Oe-Cusse hodi hein mediku foun ne’ebe atu troka matebian, sei to’o dia 16 fulan Marsu,” nia hateten.

Nia hatutan, pesoal saude husi Cuba nain 60 mak agora dadaun hala’o hela knar iha HNGV, kompostu husi emfermeirus, tekniku, mediku geral no mediku espesialistas.

The Dili Weekly