"Luta ba poder sei kontinua" iha Guiné-Bissau - investigador alemaun

Investigador alemaun ida konsidera ona katak krizi polítiku atual iha Guiné-Bissau sei mantén, tanba "luta ba poder sei kontinua", nia hatutan katak Prezidente guiniense la kontribui ba estabilizasaun hosi situasaun iha nasaun.

"Prezidente hanesan la senti satisfeitu ho nia knaar iha polítika guiniense tanba nia hanesan de'it reprezentante maibé nia hakarak iha tan influénsia iha polítika. Prezidente sei la kontribui ba estabilizasaun situasaun nian tanba, bazikamente, nia maka hahú krizi sira ne'e", refere hosi Christoph Kohl, espesialista iha tópiku sira relasionadu ho Guiné-Bissau.

Iha deklarasaun sira ba ajénsia Lusa, investigadór hosi Fundasaun alemaun ba Estudu Dame no Mediasaun ba Konflitu sira (Hessische Stiftung Friedens und Konfliktforschung) hatete "hanesan susar atu sai hosi problema ne'e", maibé nia sauda kontributu hosi diplomasia internasional ba estabilizasaun hosi krizi iha Guiné-Bissau.

"Fatór sira instabilidade nian iha rai laran maibé iha presaun maka'as ida hosi fatin oioin hodi hili rezolusaun pasífiku no demokrátiku ida. Komunidade internasional presiona Governu guiniense no atór polítiku sira hodi hili dalan pasífiku sira", nia refere.

Delegasaun sira hosi Konsellu Seguransa ONU nian, hosi Uniaun Afrikanu, hosi Uniaun Ekonómiku no Monetáriu hosi Áfrika Osidental (UEMOA) no hosi Komunidade Ekonómiku ba Dezenvolvimentu hosi Estadu sira iha Áfrika Osidental (CEDEAO) vizita ona Bissau hodi akompaña krizi polítiku ne'ebé nasaun ne'e hasoru.

Akadémiku hatutan mós katak sosiedade sivil guiniense iha knaar importante ida iha atuál krizi "tanba buka nafatin dalan pasífiku ida hodi sai hanesan rezolusaun", hanesan mós populasaun "ne'ebé la senti satisfeitu ho dalan governativu Prezidente nian".

"Populasaun bele ko'alia kesta polítiku sira ho dalan aberta, ne'ebé hanesan asaun ida ne'ebé la akontese iha Angola. Loos duni katak iha falla barak iha administrasaun públiku sira, polísia, militár sira, justisa, iha korupsaun maka'as. Maibé, ita haree mós atór barak hosi Estadu ka sira ne'ebé la halo parte tenta hetan solusaun ba falla sira nasaun nian", nia hatutan.

Kohl hatutan katak marka sira hosi kolonializmu sei prezente mós iha Guiné-Bissau no bele hamosu abuzu kbiit sira no postura autoritáriu sira.

"Iha ema barak ne'ebé sei hatudu hahalok autokrátiku ida, ne'ebé hanesan memória sira hosi époka kolonializmu nian. Maibé hanesan importante refere katak durante kolonializmu, Portugal moris iha ditadura ida. Oinsá maka ema guiniense sira aprende kona-bá demokrasia, bainhira Portugal uluk moris iha ditadura ida?", kestiona hosi akadémiku.

Guiné-Bissau iha krizi polítiku nia laran hahú hosi fulan-Agostu 2015 bainhira Prezidente, José Mário Vaz, hasai primeiru-ministru, iha tempu ne'ebá maka Domingos Simões Pereira, hodi hamosu konfrontu polítiku ida ho PAIGC, partidu Governu nian, hodi afeta funsionamentu iha Parlamentu no iha instituisaun sira seluk iha nasaun ne'e.

SAPO TL ho Lusa