POLISIA DETEIN FUNSIONARIU DNTT INKLUI PROVAS

DILI - Polísia Nasionál Timor-Leste (PNTL) liu-hosi Unidade Serbisu Investigasaun Kriminál Nasionál (SIKN), Segunda (04/04), ezekuta mandadu Tribunál hodi detein iha sela funsionáriu na’in rua hosi Diresaun Nasionál Transporte Terestre (DNTT) ne’ebé deskonfia falsifika dokumentus.

Funsionáriu nain rua ne’ebé kaptura iha sira nia rejidénsia ne’e polísia halo ona detensaun iha tinan kotuk-husik livre fali tanba evidénsia laiha, maibé polísia ejekuta fali  mandadu tribunal ikus ne’e konsege sita mos dokumentus evidésia lubuk ida.

“Depois ita simu tenta buka paradeiru suspeitu nian. Ita buka durante semana ida nia laran no ita hetan nune’e iha Segunda horisehik (horibairua), ita ezekuta kedas mandadu ne’e,” dehan Komandante SIKN, Superintendenti Ludgerio Lay dehan ba Timor Post iha Kuartel Jerál PNTL, Kaikoli, Tersa (05/4).

Nia hatutan suspeitu na’in rua ho dokumentus foti hotu hanesan evidénsia hato’o ba Ministériu Públiku (MP) atu prosesa tuir lei.

“Suspeitu detensaun hela, tanba mandadu haruka halo detensaun ita labele halo fali buat ne’ebé maka fora hosi mandadu ne’e,” Ludgerio esplika.

Suspeitu na’in rua ne’e ho naran inisiál E.J.A hela iha Aldeia Rosario, Suku Komoro, AL  hela iha Bebonuk, oras ne’e dadauk sira na’in rua sei iha hela sela polísia nia liman, hafoin SIKN kaptura iha Segunda (04/4).

SIKN Prende Kareta

Entretantu, Unidade Serbisu Investigasaun Kriminál Nasionál (SIKN) mós prende kareta Fuso rua hosi Atambua, Indonezía, tula sasán ilegál.

Komandante SIKN, Superintendenti Ludgerio Lay haktuir katak kareta hirak ne’e prende hosi polísia tránzitu liu-hosi pasa revista (check point), hafoin ne’e intrega ba SIKN.

“Kareta hirak ne’e nia dokumentus kompletu maibé sasán balun maka la tama iha lista ita asegura tiha. Agora, sira dehan nota sei iha hela uma, bainhira sira ba lori mai loos duni ita intrega fila fali,” Ludgerio tenik ba Timor Post iha Kuartel Jerál PNTL, Kaikoli, Tersa (05/3).

Lay salienta katak iha sasán oin tolu maka la tama lista atu esporta mai TL. Sasán sitadu maka hanesan Helem hamutuk 14, Lámpada no Aimoruk Herbesida.

“Ami prontu fó fila sira nia sasán ne’ebé maka ami asegura karik sira nia dokumentus komprova duni katak sasán sira ne’e tama liu dalan legál,” Ludgerio informa. Kareta fuso rua ne’e ho nia númeru matríkula hanesan L. 9651 UL ho DH. 8968 AC. (Way)

Timor Post