PN APROVA JENERALIDADE LEI PROSEDIMENTU INDULTO

DILI - Parlamentu Nasionál (PN), Tersa (5/4), aprova jeneralidade ba proposta de lei porsedimentu indultu Nú 30/III. Rezultadu votasaun a favor 45, kontra 0 no abstesaun 0.

Tuir planu, Segunda ou Tersa semana oin, Parlamentu Nasionál sei halo fali diskusaun ba proposta de lei porsedimentu indultu ne’e iha espesialidade hodi bele hetan aprovasaun finál global.

Proposta de lei porsedimentu indultu ne’ebé pasa ona iha jeneralidade, Vise Prezidente  Komisaun A Parlamentu Nasionál trata asuntu Lei, Arão Noe rekomenda atu krimi korupsaun, droga no violasaun seksuál limita atu hetan indultu.

“Tanba ne’e maka komisaun hanoin katak hakarak atu introdus buat balun, sé horsehik (horibainrua), lé relatóriu ne’ebé komisaun aprezenta temi mós krimi balun—krimi estragus nasionais, tráfiku ilisitu de entrufasiente no tráfiku umanu, krimi seksuais kontra vítima de tentra idade prinsipalmente kometidus hosi membrus prosimus família, krimi terorizmu, krimi organizadu ho sira seluk, komisaun rekomenda Parlamentu no deputadu sira konsidera atu ida ne’e sai hanesan krimi ne’ebé limite para labele fó indultu,” Arão hato’o rekomendasaun ne’e iha plenária.

Iha fatin hanesan, Xefi Bankada CNRT (Congresso Nacional da Reconstrução de Timor), Natalino dos Santos hatete durante ne’e estadu liu-hosi Prezidente  Repúblika fó tiha ona indultu ba prizioneiru balun ne’ebé sai problema iha sosiedade sivíl.

“Entaun, Parlamentu Naisonal no Governu responde ho lei indultu. Ida ne’e ha’u hakarak apresia governu liu-liu Ministériu Justisa (MJ), bele responde ona ezijénsia estadu nian,” nia apresia.

Kona-ba krimi korupsaun, droga no violasaun seksuál no seluk tan limita atu hetan indultu, Ministru Justisa, Ivo Valente hatete, en-prinsípiu rekomendasaun sira ne’e pertenente.

“Pertenente kerdizer iha razaun fundamentál ruma, presiza maka agora ita konsulta ho tékniku jurídiku sira atu haree oinsá halo redasaun ida labele viola tiha Konstituisaun Repúblika liu-liu iha artigu 85 aliñea I, ne’ebé dehan kompeténsia propria ka kompeténsia rasik ne’e Prezidente  Repúblika nian,” Ivo esplika.

Nia hatutan kuandu ko’alia kona-ba krimi sira ne’e, kompeténsia ita regula ona objetu materiál hosi kompeténsia rasik, Prezidente  bele rona ouvidu governu de’it, ne’ebé tenke halo diskusaun ida kle’an.

Nune’e mós, Prezidente  PN Interinu, Adérito  Hugo da Costa hatete, projetu de lei porsedimentu indultu ne’ebé aprova tiha ona iha jeneralidade, ninia kontiudu ne’e maka define ninia regras atu fó indultu, regras atu hetan indultu no mekanizmu to’o Prezidente  Repúblika fó indultu. 

“Agora inisiativa proposta de lei ne’ebé governu aprezenta ne’ebé agora ami aprova tiha ona iha jeneralidade ne’e, iha ninia kontinua maka oinsá atu fó kritérias, regras atu fó indultu, kritéria atu hetan indultu ne’ebé to’o últimu Prezidente  Repúblika atu ezekuta tuir mandatu konstitusionál artigu 85  fó ba Prezidente  Repúblika,” nia esplika.

Mantein  Diskusaun Lei Indultu

Iha parte seluk, Organizasaun Naun Governamentál  Judisiáriu Sistema Monitorizasaun Programme (JSMP) kongratula Parlamentu Nasionál ne’ebé tau konsiderasaun no fó importánsia hahú aprova jeneralidade lei indultu nian hodi prepara ba diskusaun espesialidade.

Ho lei ne’e, tuir JSMP, bele regula kompeténsia Prezidente Repúblika nian no JSMP propoin iha krimi sira ne’e la’os  limita prezidente nia kompeténsia, maibé limita autór sira komete krimia korupsaun, tráfiku umanu, droga, violasaun seksuál, terorizmu no brankamentus kapitais.

“Tan ne’e,  JSMP apoiu tebes krimi sira mensiona iha leten labele hetan indultu. JSMP rekomenda ba Parlamentu Nasionál atu mantein nafatin diskusaun ba lei  indultu iha diskusaun espesialidade para lei indultu aprova iha diskusaun espesialidade bele taka kuak ba autór sira komete krimi sira mensiona iha leten,” informa Diretór JSMP, Luis Sampaio ba Timor Post iha nia kna’ar fatin, Tersa (5/04)

Tuir nia, ba krimi korupsaun, nia implikasaun sosiál boot, tanba  korupsaun akontese, tanba ema utiliza poder públiku ninian. Tuir loos, nia hatutan, ideal atu servi interese povu no públiku, maibé nia utiliza ba interese benefísia nia án.

“Ne’e atu fó mensajen ba autoridade públiku sira no privadu sira ne’ebé kaer no maneja osan estadu ninian, inklui instituisaun privadu sira maneja osan estadu ninian, hatene ona. Bainhira ita komete krimi korupsaun no hetan provadu, ita laiha oportunidade atu hetan indultu. Ne’e mensajen ida ne’ebé taka kuak hotu ona, tan ne’e ema atu hala’o krimi sira sempre tentu ona nia risku iha futuru,” Sampaio informa.(jos/Max)

Timor Post