Sentru Fini Ikan Gleno, Iha Potensia Produs Fini Ikan Nila Ba Dejenvolvimentu Aquakultura

Radio Liberdade Online - Ministro do Estado Coordenador asuntu Economico e Ministro da Agrikultura e Pescas, Estanislau Alexo da Silva no Embaixador Nova Zelandia, Jontahan Schwass halao Vijita trabalho iha Municipio Ermera foin lalais ne’e hodi halo lansamentu ba Sentru Fini Ikan.

Timor-Leste agora sasin ba sentru fini ikan foun iha Gleno ne’ebe lansa ona, ida ne’e parte importante ida husi estratejia dejenvolvimentu aquakultura nasional Timor Leste nian, ne’ebe ho objectivu atu atu hasae konsumu perkapita ikan husi atual 6 kg to’o 15 kg iha tinan 2020.

Sentru Fini ikan ne’e hakiak ikan (oan) Nila ne’ebe sei distribui ba aquakultores sira. Direitur Jeral Ministeriu Agrikultura e Pescas, Horacio Gutteres, informa katak hafoin lansamentu,  Fini ikan oan sei intrega ba komunidade aquakultores sira atu kontinua hakiak hodi hadia sira nia moris.

Juje Dedeus, Direitur Agrikultura Municipio Ermera, haforsa liutan katak “fahe ba Grupo sira ne’ebe hakiak ikan ho hare ba grupu sira ne’ebe perpara kolam ne’ebe diak, no ekstensionista suku hare katak perparadu duni kalae, tamba buat ne’ebe distribui, sira hakiak hodi hasae rendementu ekonomia familia no uja ba komsumu.”

“Dejenvolvimentu Aquakultura sai mos prioridade ida husi Governu ida ne’e nian, ikan Nila partikularmente iha potensia bo’ot tebes tamba nia adaptasaun, kualidade nutrisaun no potensia atu hadi’ak disponibilidade ikan ba komunidade sira,” relata Ministru da Silva.

“Area agrikultura mos area ida ne’ebe importante tebes husi aktividades Nova Zelandia nian iha Timor Leste,” katak Embaixador Schwass. 

Schwass hatutan, “area ida ne’e iha potensia atu hasa’e liutan kuantidade proteina ne’ebe disponivel ba uma kain sira, no ajuda aquakultores sira atu hakiak sira nia viabilidade negosiu nian.

Liu husi programa ne’e, WorldFish fornese ona 10.200 ikan inan aman genetikamente hadia ona ba iha sentru fini ikan ida ne’e.

“Sentru Fini Ikan ida ne’e sei halao nia knar ne’ebe importante tebes atu fo foenesementu ikan no ikan oan ho kualidade ne’ebe diak, WorldFish iha komitmentu maka’as atu suporta dejenvolvimentu seitor agrikultura ihaa Timor Leste,” Neil Preston, Direitur Geral WorldFish hateten.

Ikan Nila GIFT ne’ebe dejenvolve husi WorldFish bele moris iha ambiente ne’ebe minimu no bele moris lais liu duke ikan sira seluk. Ikan ne’e la persija aimoruk antibiotika ruma, no sai rekursu nutrisaun ne’ebe persija husi labarik no inan isin rua sira.

Sentru Fini Ikan Gleno iha potensia atu produs ikan oan to’o miliaun lima kada tian  hodi fornese ba sentru fini ikan sira seluk no aquakultores sira ne’ebe haki’ak ikan Nila.

Sentru Fini Ikan ida ne’e parte ida husi parseiru dejenvolvimentu Aquakultura Timor-Leste – Nova Zelandia ho montante osan miliaun $4 ne’ebe sei inklui mos dejenvolvimentu sentru fini ikan salmaun(milkfish)iha Vemase, dejenvolvimentu hahan ikan husi rekursu ne’ebe disponivel iha komunidade local, no dejenvolvimentu sistema merkadoria ba ikan Nila no Salmaun.

Sentru Fini Ikan Gleno apoiu husi Diresaun Nasional Aquakultura no Pesca, Ministeriu Agrikultura e Pescas  (DNA – MAP), New Zealand Aid, National Institute of Water and Atmospheric Research (NIWA), Organijasaun Internasional WorldFish, Parseiru Peskija Agrikultura Global Nian Ba Futuru Ai-han ne’ebe Seguru (CGIAR) no Servisu Agrikultura Insependenti (Tisbe Ltd). 

Radio Liberdade Dili