LEVANTA FM IHA ONU, HORTA:“RAI BARAK APOIA TL NIA LUTA”

Eis Prezidente Republika José Ramos Horta, nudar mos diplomata senior  Timor-Leste nian ne’e informa, kestaun levantamentu disputa Fronteira Marítima (FM) husi Xefi negosiador Kay Rala Xanana Gusmão iha Organizasaun Nasoens Unidas (ONU) hasoru Australia ne’e, nasaun barak apoia TL hodi luta ba nia soberania.

“Luta ne’e iha rai barak apoia laiha rai ida la apoiu, tanba  sira haree  iha rai hotu-hotu tenke tuir direitu internasional.  Fronteira Marítima  ne’e direitu internasional, ne’e duni sira hotu a favor  Timor  Leste ho Australia halo dialogu. Timor  prontu halo dialogu, Australia deit maka lakohi,”deklara José Ramos Horta hafoin fila husi Inglatera ho aviaun Silk Air  iha Aeroportu Internasional Nicolau Lobato Comoro, Dili, Tersa (19/04).

Eis Prezidente Republika Jose Ramos Horta,  apoiu Governu 100%,  tanba bele lori prosesu kazu disputa fronteira entre Timor Leste ho Australia ba  levanta to’o iha Nasoens Unidas.

“Ha’u la ba Nova  Iorque, ha’u ba Inglatera halo servisu seluk ba Ethiopia, maibe  prosesu ne’ebe Governu hatama ha’u  nudar  Timor oan, eis  Prezidente Republika ha’u apoiu100%, ”esplika José Ramos Horta.

Jose Ramos Horta dehan, luta ne’e tenki  kontinua, luta politika diplomatika la’os fasil.

“Maibe  ita nia Governu, Estadu tuir direitu Internasional, tuir  ne’ebe ita fiar ne’ebe los, ha’u mos fiar tempu ruma Australia sei muda nia pozisaun, ha’u haree presaun  sei aumenta ba Australia eleisaun iha Australia mos mai dadauk, Governu sei muda karik ne’e duni  importante maka  ita nia Estadu nia pozisaun ho ulun  malirin  ho matenek ho direitu internasional  iha ita nia kotuk,  dudu  prosesu ne’e, maibe ao mesmo tempu buka hametin nafatin relasaun  ho Australia,”dehan Ramos Horta.

Ramos Horta kontinua dehan, relasaun  Timor Leste ho Australia la’os  ba asuntu ida deit, maibe kooperasaun seluk kontinua, maibe ne’e kestaun prinspiu ida  direitu Timor  nian  tenke luta to’o manan.

“Dala ruma sei demora tempu, maibe  ho matenek ho ulun malirin  ita manan,”tenik Ramos Horta.

Nune’e mos Ramos Horta dehan,  iha nia vizita ba  Inglatera no nasaun seluk sempre koalia kona-ba Asia tomak, maibe  hatama mos kestaun soberania tasi nian ba rai hot-hotu.

“Ha’u esplika  situasaun  ita nian la’os  tasi Timor deit, maibe buat  asuntu iha Timor buat barak,  ha’u esplika simples los ema kompriende ema simpatia ho ita,”tenik Ramos Horta.

Rai  ne’ebe maka hanesan Australia riku bo’ot los, Timor  independensia foin maka tinan 15, difikuldade oi-oin no  Australia hanesan la simu  fali direitu internasional la simu fali Timor nia direitu, ne’e labele.

“Uluk  Governu Dotor Mari Alkatiri halo negosiasaun ho honestetidade, maibe   sira tau fali  ekipamenu espionazen,  ne’e halo ema hakfodak. Ne’e duni  ha’u nia konselhu ba Australia nudar  amigo ida diak liu sira hanoin dadauk ona muda ne’e para labele estraga ralasaun rai rua, estraga sira nia naran  iha mundu ne’e,”haklaken Ramos Horta.

Nune’e mos, Ramos Horta dehan, nia sei koalia ho Xefi negosiador fronteira maritima Kay Rala Xanana Gusmão iha semana ida ne’e para hetan briefing didiak.

“Se Primeiru Ministru ho maun bo’ot haruka ha’u tau matan ba ida ne’e, ha’u  soe kedas buat sel-seluk tau matan ba buat ne’ebe Timor nian, ne’e duni ha’u hein maun bo’ot Xanana fo briefing kona-ba  buat balun, tanba  nia mos akompanha haree oinsa ha’u bele tulun,”dehan Jose Ramos Horta.

“Ami hotu buka apoia maun  Xanana, buat ne’ebe  nia presiza, maibe  nia iha ekipa bo’ot ona, ema espesial direitu internasional iha mundu ne’e todan tebes husi  Inglatera nian, Amerika hotu-hotu apoiu, Australia  mos,”dehan Ramos Horta.avi

Jornal Nacional