Estadu Presiza Dignifika Loron Masakre Sira

DILI, (ANTIL) – Estadu presiza komemora no dignifika loron masakre sira hanesan Liquisa, Suai, Maununo, Tumin, Lospalos no rezidénsia Manuel Carrascalão hanesan parte ida rekopera família vítima sira.

”Masakre sira ne’e parte istória Timor nian, entaun presiza iha afirmasaun ba produtu lei  hosi parlamentu, nune’e vítima sira bele sente ho sakrifísiu ne’ebé husik hela, hanesan parte ida hosi kontribuisaun ba luta ukun rasik-án”, Koordenadór Aliansi Nasionál ba Tribunál Internasionál, Sisto dos Santos ba ANTIL iha Farol, Segunda, (29/8), relasiona ho komemorasaun loron konsulta populár ba dala 17.

Pasadu nu’udar prinsípiu fundamentál hodi harii demokrasia, justisa no nasionalismu ba agora no futuru.

Tuir nia, estadu seidauk iha polítika espesifika hodi tau matan no trata vítima violasaun direitus umanus.

”Seidauk iha seriedade hosi instituisaun estadu hodi dignifika vítima sira ne’ebé sei vulneravel hela, nune’e mos labele jeneraliza, ema ne’ebé vítima ne’e veteranu nia oan hotu”, katak tan.

Tuir konseitu direitus umanus universál, ema sivil bai-bain, ema kbi’it la’ek ne’ebé sai alvu ba konflitu polítika ida, sira ne’e hanesan vítima.

Entaun, nia argumenta, presiza formula no elabora esfesifikamente ba ema sira ne’ebé mak vítima no inosente ba violasaun direitus umanus.

”Estadu iha polítika di’ak, soke seidauk akomoda ema sira ne’ebé kategoria ba vítima inosente no vulneravel”, katak tan.

Tuir relatóriu Komisaun Akollamentu Verdade no Rekonsiliasaun, estimasaun ema 102, 800 toó 183,000 ema sivil mak mate durante periodu 1974 to’o 1999 tan kauza hosi konflitu polítiku.

Maizumenus 18,600 ema oho ou halakon, maioria komete hosi forsa Indonézia no seluk, hosi 84,200 ou liu mate, tanba hamlaha no moras. (jornalista: Rita Almeida)

Foto: Koordenadór Aliansi Nasionál ba Tribunál Internasionál, Sisto dos Santos ba ANTIL iha Farol, Segunda, (29/8), relasiona ho komemorasaun loron konsulta populár ba dala 17. Foto ANTIL