MPOTK Sei Monta Tan Ahi iha Estrada

DILI, (ANTIL) – Atu fo naroman iha estrada tempu kalan nian, Minesteriu Obras Publikas, Transporte no Komunikasaun (MPOTK) sei monta tan ahi (lampu) balun iha estrada ne’ebe identifika ona.

Planu monta tan ahi iha estrada ne’e mos hodi responde preokupasaun ne’ebe hato’o hosi ONG BELUN iha semana 23 Agostu 2016 ne’ebe rekomenda ba MPOTK atu monta ahi no CCTV iha fatin publiku no risku ba asaltus sira ho Rama Ambon atu nune’e bele evita no detekta autór sira.

Ba ANTIL, Vice Ministru MPOTK , Januário da Costa Pereira, governu iha obrigasaun atu fo naroman ba nia populasaun iha teritoriu tomak, inklui mos iha sidade laran hodi redus mos riskus ne’ebé perigosu ba asaltus fíziku.

“Ita kontinua fó extende linhas média atensaun ba suku sira, maibé iha Dili laran mos kontinua fó linha ahi iha estrada maibe, buat sira ne’e ita labele resolve iha tinan ida nia laran, ita tenke halo fazeadamente tamba ami halo jestaun tuir rekursu ne’ebé iha,” nia dehan ba ANTIL, Segunda (29/08/2016), iha nia knar fatin, Caicoli, Dili.

Nia hatutan, Ai-ring iha estrada sira só falta halo lakan deit no ita extende ba área ne’ebé presiza.

“Kona ba CCTV Ministériu Interior mak toma-konta, tamba sira mak kontrola krime iha rai laran,” dehan Vise Ministru Januario. - Jornalista: Julia Chatarina / Editor: Gantry Meilana

Foto: Ai-ring iha Cidade Dili (Foto ANTIL: Julia Chatarina)