DULCE MINISTRA EDUCASAUN INTERINA

DILI - Iha Loron rua fulan Juñu tinan 2015, Ministru Estadu Koordenador Asuntu Sisiais no Ministru Edukasaun, Fernando La Sama de Araújo  hakotu nia iis, Primeiru Ministru, Rui Maria de Araújo fo kedas orientasaun ba Vise Ministra Dulce de Jesus Soares asume kargu Ministra Edukasaun Interina.

“Ami rua hamutuk kontinua programa ne’ebé Maun Fernando La-Sama trasa ona hetan aprovasaun hosi Governu hosi Parlamentu depois implementa aktividades hotu para ba oin depois hein desizaun hosi Premeiru Ministru no Konsellu Ministru kona-ba  desizaun definitivamente hanesan Ministru Estadu Koordenador Asuntu Sosiais no Ministru Edukasaun,” informa Vise Ministru Edukasaun, Abel Ximenes Larisina ba jornalista sira iha Ministériu Edukasaun, Sesta (05/06).  

Larisina haktuir, planu barak maka La-Sama trasa ona hamutuk ho sira nain rua (vise nain rua) no hetan ona aprovasaun iha Konsellu Ministru. Tanba ne’e, maske La-Sama fila ona, sira nain rua kontinua implementa programa ne’ebé iha ona hodi kontinua hadi’a edukasaun iha Timor Leste.

“Ha’u  sei servisu hamutuk ho Ministra interina mana Dulce kontinua programa sira ne’ebé maka ami nain tolu halo tiha ona ne’e,balun resolve tiha ona no balun sedauk, ami nain rua sei kontinua fali, sei la husik, tenki halo hotu depois maka ami nain rua halo tan programa foun,” subliña Larisina.

    

Larisina haktuir, problema barak maka sira konsege resolve ona, liuliu kona-ba  disiplina, tanba ne’e nia husu ba Diretór  eskola ensinu pre eskolar to’o ba iha ensinu sekundária mantein disiplina.

“Ami haré  disiplina iha eskola sira maioria implementa ona, tanba ne’e husu ba diretór  eskola no profesores sira mantein nafatin ida ne’e ba oin, no problema seluk ne’ebé  resolve maka kona-ba  livrus eskola iha ona, tanba ita iha sentru impreme rasik, ne’ebé  livru ita maka produs rasik,” hatutan Larisina.

  

Larisina dehan, Saudozu La-Sama ema ne’ebé konsistente duni tanba nia la’ós ohin ko’alia ida, aban ko’alia seluk. Saida maka sira disidi hamutuk iha meza leten maka sira ko’alia ba públiku. Katak, La-Sama sai duni lider ida ne’ebé konsistente ba dezenvolve edukasaun iha Timor Leste.

Tanba ne’e, Larisina subliña, programa ne’ebé sira trasa hamutuk ona sira nain rua Ministra Edukasaun Interina kontinua hala’o hodi hein Primeiru Ministru nia desizaun difinitivu.

Larisina fó sasin bainhira nia rasik akompaña Saudozu La-Sama iha Suai, bainhira La-Sama halo hela diskursu too klaran monu, nia ho vese ministra Dulce kontaktu kedas ba Primeiru Ministru Rui no Ministru Xanana haruka kedas aviaun Helikoptru hodi evakua ba Dili.

“Entaun iha ne’eba kedas ha’u  ho Vise Ministra atual Ministra Interina deside ha’u  kontinua nafatin enkontru ho diretór  eskola sira, vise Ministra maka akompaña mai Dili ne’e, tuir ninia (La-Sama) orientasaun ne’ebé  nia fo mai ha’u, nia lahatete dehan nia moras, maibé  nia dehan mai ha’u  ita nia programa ne’e tenki halo to’o rohan, tanba ne’e ha’u  hanoin fali nia lia fuan ne’e, entaun ha’u  kontinua to’o programa ne’e hotu,” hatuir Larisina.

Entretantu Ministra Edukasaun Interinu, Dulce de Jesus Soares, iha nia omenajen ikus bainhira lori isin mate ba Ministériu Edukasaun, Dulce haktuir, nia ho Vise Larisina hamutuk ho Saudozu La-Sama trasa tiha ona planu estratejia ba edukasaun iha Timor Leste.

Planu lubuk maka sira hala’o ona, balun seidauk liuliu oinsá maka muda eskola sira sai zona saudavel hodi bandu fuma, bandu estudante sira tolok no planu sira seluk ne’ebé hakarak muda estudante sira hadook a’án  hosi impaktu negative no sosiedade tomak.

“Atu asegura katak eskola sira hotu bele iha asesu ba meiu komunikasaun efikaz ho sede munisipál  no nasionál,” Ministra Interinu Dulce subliña iha nia diskursu.

Iha oportunidade, Ministra Interinu Dulce subliña, Saudozu La-Sama ema ida ne’ebé  halo asaun bazeia ba perinsípiu. Ministru buka informasaun atu bele kompriende didi’ak  asuntu edukasaun no fo importansia boot liu ba eskola no labarik sira nia aprendezajen.

Semana rua loron ikus Ministru La Sama husu kona-ba kuríkulum. Nia hadomi tebes nia rain no hakarak asegura katak alunus sira hotu aprende didi’ak  kona-ba  istória  no rejisténsia hodi dezenvolve sira nia sentidu nasionalizmu no domin ba sira nia rain.

“Maun,  Kolega, belun, eroi nasaun nian, no ministru ami nian, ami sei lahaluha ita boot nia vizaun forsa vontade no defeza ba ita nia kultura no povu. Iha ministériu edukasaun ami bele jura katak ita boot lamate, ami asegura katak ita boot nia ligadu la’o  ba oin. Ami la konsentra kona-ba  ami nia laran susar katak Ministru laiha ne’e ona,” hatete Ministra Interina Dulce ho mataben iha presta omenazen ikus ne’e. (fer)

Turki Reis – Timor Post