XANANA: LA SAMA VALE DUNI

METINARO - “La-Sama ...O ba tiha ona! Iha ne’ebé  karik, buka nafatin hamutuk ho aswain sira seluk, tau matan ba ami ne’ebé  sei moris, hodi sai servidor di'ak ba rai ne’e no povu ne’e,” tenik Kay Rala Xanana Gusmão ho mataben iha omenajen ikus ba Saudozu Fernando La-Sama de Araújo.

Xanana konsidera lia menon La Sama nian moruk no lulik tebes, tanba ne’e Xanana husu ba sidadaun hotu liuliu sira ne’ebé iha Partidu Demokrátiku (PD) tenke hamutuk, la’ós  hamutuk oinsa....maibé tenke hamutuk iha hanoin hodi dezenvolve nasaun ne’e ba oin ho lalais liutan.

“Ha’u koñese nia bainhira ha’u tama iha Cipinang, iha tinan hitu (7) ne’ebé ha’u hare duni katak La Sama fó duni nia laran tomak atu organiza estudantes Timoroan sira atu hakarak ita nia mehi, ita nia hakarak no ita nia funu ba sosiedade Indonézia,” hatete Xanana iha seremónia funeral La Sama nian iha Metinaro-Dili, Sesta (05/06), relasiona ho mensajen ikus La-Sama nian husu ba timoroan hotu hamutuk hodi dezenvolve nasaun Timor Leste.

“Ita nia estudante sira ne’e maske ba estuda iha Indonézia, maibé isin no klamar hanoin nafatin ba ita nia funu hodi liberta ita nia rai,” hatete Xanana.

Xanana hatutan, La Sama nia ijemplu moris tenke sai matadalan ba joven sira hotu no ba jerasaun foun tuir mai, tanba ohin loron ema ida-idak hadau liu ba nia a’án  rasik no grupu sira mós hadau ba sira nia grupu rasik hodi haluhan tiha katak, Timor-Leste sei fraku no nasaun ne’e sei iha hela prosesu konstrusaun nia laran.

“Ha’u hatene katak, imi (Partidu Demokrátiku) iha susar nia laran, hamutuk ba hodi tau interese nasaun nian a’as liu. Dezafiu ida....dezafiu ida, keta haluha La Sama husu hamutuk ba. Hamutuk ba la’ós  kaer liman ba malu hodi tebe no dahur, maibé hamutuk iha hanoin no hamutuk iha hahalok hodi halo buat ruma di’ak ba ita nia rain” sujere Xanana ba estrutura PD nian.

Xanana mós konsidera La Sama nia kontribuisaun durante tempu rezisténsia  no to’o faze independensia maka’as tebes, tanba durante tempu rezisténsia  La Sama fó án  tomak atu liberta rai ida ne’e no tama ba era independensia La Sama mós kontribui nafatin hodi hala’o serbisu nasaun nian to’o mate iha serbisu fatin.

“Tanba ne’e jerasaun foun sira tenke banati tuir saida mak La Sama hatudu tiha ona, tenke hamutuk hodi dezenvolve nasaun ne’e, labele ida-idak buka hadau ninian de’it, ne’e ladi’ak” sujere Xanana ba jerasaun foun sira.

Hafoin diskursu, Xanana foti bandeira nasionál entrega ba Lírio  Hadomi Aquino Araújo hodi últimu omenajen  ba nia Aman La Sana. (oki)

Turki Reis – Timor Post