KLINIKA BAIRO PITE LAIHA KONDISAUN FATIN

Dotor Daniel Murphy informa katak, falta kondisaun fatin hodi fo atendementu ba pasiente sai preokupasaun bo’ot ne’ebe nia parte hasoru, tanba kada loron pasiente ne’ebe hala’o tratamentu iha klinika Bairo Pite sempre liu ema atus ida.

“Ba buat hotu ami laiha preokupasaun no problema maibe problema no difikuldade ne’ebe mak ami hasoru mak fatin klot liu hodi laiha espasu ba pasiente atu dada is ba sira ne’ebe baixsa liu-liu ba sira ne’ebe moras Tuber Colose (TBC). Iha mos moras lepra no inan isin rua sira ne’ebe atu partus,”Dr. Daniel Murphy informa ba Jornal Nacional Diário iha nia servisu fatin Bairo Pite, Kinta (4/6).

Alende ne’e, klinika refere falta transporte liu-liu Ambulancia hodi atende pasiente balun iha area rural ne’ebe presija halo tratamentu.

Tuir nia Desde harii klinika Refere iha Tinan 1999 pasiente ne’ebe mai konsulta sempre liu ema nain lima nolu kada loron ida ne’ebe kada loron ida ema nain ida ou rua sempre baixa tanba hetan moras TBC.

Nia hatutan ho pasiente ne’ebe barak maibe laiha fatin tuir Dr. Daniel presija osan hodi aumenta konstrusaun no selu enfermeiro sira ne’ebe halao knaar iha fatin refere.

“Tinan rua ona ami la hetan ajuda husi parte Governu maibe antes ne’e ami hetan ajudu orsamentu 15 mil kada fulan no hetan mos ajudus aimoruk ituan husi SAMES. Nune’e mos ajudus materia no mediku permanente husi Estados Unidus, Irlandia, Australia no seluk tan,”dehan nia.

Dr. Daniel hatete, durante ne’e klinika refere hakarak servisu hamutuk ho aprte Governu liu husi Ministerio Saude (MS), maibe sempre liu husi prosesu ne’ebe naruk nune’e sai difikuldade ba klinika refere.

Moras ne’ebe dadauk domina iha klinika refere mak TBC hamutuk ema nain 55 kada fulan ida, inan isin rua liu ema atus ida.Total moras TBC no inan isin rua ne’ebe halao tratamentu iha klinika refere hahu Fulan Janeiro too Fulan Abril Tinan ida ne’e hamutuk em anain 10.000. Tantu mortalidade iha klinika refere tuir Dr. Daniel menus husi un porsentu.

Numeru mediku ne’ebe oras ne’e halao atendementu ba pasiente mediku estudante husi Australia no Inglatera hamutuk ema nain 4 no Dr. Nain rua husi Australia.

Ho pasiente ne’ebe akda loron ho numeru bo’ot, Dr Daniel hatete sei presija tan mediku Timor oang nain rua tan atu juda maibe too agora laiha mediku ida ne’ebe fornese an hodi servisu iha klinika refere.

Iha Parte seluk, Agustinho Pinto nu’udar pasiente moras TBC hatete, la espera katak nia baisa iha klinika refere tanba antes ne’e nia mear babain deit no hakrak ba konsulta hodi simu aimoruk deit atu fila maibe too iha klinika Dr. Daniel haruka baisa tanba deskonfia moras TBC.

“Antes ne’e ha’u konsulta iha sentru saude Bairo Formosa no sira fo deit aimoruk hodi haruka hau fila maibe tanba hau sente ladiak no mear nafatin entaun hau mai iha ne’e atu konsulta maibe ikus mai Dr. Haruka hau baisa deit, halo hau mos hakfodak tanba hau sente hau diak hela,”Agustino hatete.

Nia hatete sente apresia ho atendementu ne’ebe klinika refere fo tanba maske fatin baisa klot maibe atensaun husi mediku sira ba pasiente la klot tanba sira sempre sura oras hodi hare sira ho atendementu ida ne’ebe diak nunka kolia ho liafuan makaas.

Tuir observasaun Diário ne’e nota katak, pasiente barak hili klinika refere hodi ba konsulta maske tenki hein ho oras barak tanba antes Dotor hala’o konsulta ba pasiente sira ne’ebe foun Dr. Daniel ho nia ekipa tenki halao vijita ba nia pasiente sira ne’ebe baixa kuaje oras tolu.Ola

Jornal Nacional