PM KOLOKA BATALLAUN IDA IHA BATUGADE

Komando FALINTIL - Força Defesa de Timor Leste (F-FDTL) destaka ona Polisia Militar (PM) Batallaun ida iha Fronteira Batugade, hodi fo apoiu ba Unidade Polisia Fronteira iha Munisípiu Bobonaro.

Hafoin hasoru malu ho Prezidenti Republika (PR), Taur Matan Ruak, iha Palasiu Prezidensial, Kuarta (03/6/2015), Vise Xefi Estadu Maior F-FDTL, Brigadeiru Filomeno Paixão, klairifka katak, kolokasaun PM iha linha Fronteira bazeia ba pedidu husi autoridade administrativu no komunidade iha linha Fronteira atu bele reforsa liu tan servisu operasional Unidade Polisia Fronteira (UPF) no kolabora atu oinsa maka minimiza negosiu illegal iha Fronteira.

Membru Polisia Militar iha Fronteira koloka iha postu 12 atu bele koopera servisu diak liu tan ho UPF no komunidade sira.

Iha sorumutu ho PR Taur Matan Ruak, Vise Xefi Estadu Maior F-FDTL, Brigadeiru Filomeno Paixão, ne’ebe akompanha mos husi Koronel Falur Rate Laek, koalia liu kona-ba situasaun jeral Timor Leste nian ne’ebe kondusivu no kontroladu.

Enkontru rutita ne’ebe mak autotidade Defeza ho Seguransa halo ho PR Taur Matan Ruak ne’e, sempre follow-up ba PR Taur kona-ba situasaun defeza ho seguransa nian iha teritoriu nasional.

Sorumutu ne’e, koalia mos kona-ba situasaun militar nian, liu-liu lala’o dezenvolvimentu iha istituisaun F-FDTL nia laran.

Husi sorin seluk, PR Taur mos simu prezensa Komandante Jeral Polisia Nasional Timor Leste (PNTL), Komisariu Julio Hornai, hodi informa mos ba PR Taur kona-ba situsaun rai laran nian.

“Ha’u informa ba PR Taur kona-ba situasaun jeral iha teritoriu Timor tomak ne’ebe kondusivu, maske iha kazu ki’ik oan balun, hanesan violensia domestika, agresaun fiziku no asidenti ki’ik ne’ebe maka sempre akontese,” hateten Julio Hornai, hafoin hasoru malu ho PR Taur.

Kona-ba difikultades UPF nian, Julio Hornai klarifika katak, maske polisia sei infrenta difikuldades oi-oin, maibe la’os sai obstaklu bot ba Polisia atu halao nia knar no dever.

“Membru polisia ne’ebe maka hanoin katak, instituisaun PNTL tenke iha fasilidades perfeitu hanesna polisia sira Amarica ho Autralia, diak liu rezigna-an,” afirma Julio Hornai.

Julio Hornai dehan, Governu sei iha responsabilidade para atu bele hadia moris seguransa ho defesa, tanba seguransa ho defesa metin maka dezenvolvimentu bele lao, entaun tenki tau osan ruma atu sira bele dezenvolve sira nia moris. avi

Jornal Nacional