DISKONFIA DEPUTADU SAI MAKELAR, LABELE MINIMIZA ORGAUN SOBERANU

Prezidenti Interinu Parlamentu Nasional (PN), Adriano do Nascimento, husu ba media atu la bele minimiza orgaun soberanu sira ne’ebe deskunfia membru PN ho membru Govenu balun sai makelar ba projetu Estadu.

“Hau lakohi komentar kona-ba rumoris, agora se’e individu iha prova ona ne’e klaru ke ita kualia, agora hau lakohi Media sira minimiza fali orgaun sobernu ida,” hateten Adriano do Nasçimento hodi responde JNDiario iha iha PN, Tersa (8/9/2015).

Adriano hateten, se iha duni deputadu balun sai makelar, ne’e individu maibe tenki ho provas. Atu dehan deit katak, la bele jeneraliza Parlamentu halo fali makelar ba buat sira ne’e.

“Imi Media mak atu minimiza orgaun sobrenu , ida ne’e ladiak. Hau husu ba Media sira ita nia nasaun ne’e nasaun foun, agora iha faze de konsilidasaun instituisaun Estadu ne’e nian ita la bele hare individu ida halo asaun ida, depois ita jeneraliza instituisaun tomak ne’e, entaun ita jeneraliza ona Estadu ne’e. Hau la fiar bainhira la iha provas,” afirma Adriano do Nasçimento.

Adriano do Naçimento husu se’e imi Media iha dadus imi hateten, deputadu A Deputadu B halo depois imi iha faktu ne’e bele kualia.

Bainhira husu karik se’e individu deputadu mak involve, Adriano do Naçimento hatan, se’e iha provas hateten mai deputadu A ka B halo hela makelar depois Komisaun Etika iha nia prosedimentu para disisidi deputadu ne’e atu sai deputadu ka atu sai bisnismen.

“Ami iha kodiku rejimentu Parlamentu nian atu preve, mas hau atu hateten la bele lori fali opiniaun ema seluk ida nian mai fali hodi minimiza orgaun soberanu,”dehan Adriano.

Orgaun sobernu ne’e ema hotu nian labele politiku individu ou Jornalista individu ida rona tiha rumoris depois hodi kose ba –kose mai depois hodi hatun dignidade orgaun sobrenu ida nian dignidade Estadu ida ne’e nian. Se’e imi Media mak atu halo fali polimika, imi rasik mak atu hatun Estadu ida ne’e.

“Hare lei Media nian ne’ebe mak ami aprova ne’e, se’e imi temi ema nia naran sala mos ema lori imi ba Tribunal, tanba ne’e mak ita halo lei para regula Media ne’e, para Jornalista ida-idak iha responsavilidade atu hato news ne’e, Media nain ida-idak iha responsavilidade atu hato news ba lei sira laos ita halo konfuzaun,” haklaken Adriano do Nasçimento.

Adriano do Naçimento dehan, media ne’e tenki iha informasaun kredibel. Exemplu, temi deputadu ida sira bele lori Media ba iha Tribunal.

“Deputadu ne’ebe mak halo sai makelar, imi iha dadus, imi bele hateten para hau halo despaisu ba komisaun Etika para halo investigasaun,” hateten Adriano do Nasçimento. avi

Jornal Nacional