DILI,
(ANTIL) – Maijór Jenerál FALINTIL-Forsa Defeza Timor-Leste (F-FDTL), Lere
Anan Timur hatete, problema oknum F-FDTL tiru ameasa membru Polísia Nasionál
Timor-Leste iha Lospalos no Oe-Cusse konsidera hanesan krime no sei haree ninia
gravidade, kuandu oknum F-FDTL komete sala, sei hasai hosi
instituisaun militár.
“Ita
besik atu lakon ita nia tradisaun lideransa no tradisaun nu’udar timoroan,
presiza edukasaun sivíka para bele transforma mentalidade át,” Maijór Jenerál
esklarese ba jornalista sira hafoin hasoru malu ho Prezidenti Repúblika, Taur
Matan Ruak iha Palasiu Prezidensiál Bairopite, foin lalais ne’e.
Nia
informa jerasaun foun sira nia mentalidade át tenki muda no transforma
mentalidade ida ne’ebé dehan militár manda buat hotu-hotu.
“Kilat
ne’ebé ita ka’er la’ós ba ita nia povu, hanesan mós membru polísia. Ba ami
hanesan komandante forsa armada, situasaun agora ba ami oin seluk ona. Uluk
ha’u tolera demais tanba katuas sira ne’ebé durante tinan 24 nia laran iha
ailaran kontribui mós ba instituisaun F-FDTL. Maibé, agora mesak jerasaun foun
de’it, entaun halo ha’u komesa duru”, Lere afirma.
Lere
reafirma, hadomi instituisaun ne’e tenki ho laran, purké Timor la’ós hanesan
uluk kolonia Portugés ka “Merah Putih” nia okos. Estadu ne’e Estadu, individu
labele koko estadu, estadu nee nasaun TL maka forma estadu, estadu iha forsa. (jornalista:
Xisto Freitas; editora: Rita Almeida)
Foto:
Maijór Jenerál F-FDTL, Lere Anan Timur ko'alia ba jornalista sira iha Palásiu
Prezidénsia Repúblika, Bairu-Pité.
Sem comentários:
Enviar um comentário