Timor-Leste
respeita vontade ne'ebé maka ema norte-amerikanu sira hatudu iha urna no
felisita republikanu Donald Trump ba vitória ne'ebé hetan iha eleisaun
prezidensial sira iha loron-tersa, hatete hosi ministru Negósiu Estranjeiru
timoroan nian ba Lusa.
"Nu'udar
Estadu, ami respeita, hanesan sira seluk, vontade popular. Povu amerikanu
desidi hili ona señór Trump. Hanesan vontade ida ne'ebé povu amerikanu hatudu.
Ami tenki felisita no serbisu ho nia", Hernâni Coelho hatete ba Lusa.
"Ami
tenki respeita no serbisu iha mekanizmu internasional nia laran, ho meiu sira
ne'ebé disponível, respeita regra sira konvivénsia nian no ami sei kontinua
halo", nia afirma.
La
hato'o tan avaliasaun sira kona-ba rezultadu hosi eleisaun sira iha Estadus
Unidus, xefe diplomasia timoroan nian hatete katak hahú hosi inísiu kampaña
nian to'o debate ikus ema sira ne'ebé akompaña prosesu eleitoral
"interpreta ho preokupasaun maka'as no ki'ik" kona-ba saida maka
akontese.
"Iha
segmentu ida-idak hosi sosiedade nian iha nia interpretasaun kona-ba saida maka
sira haree no rona. Buat sira ne'e reflete nafatin iha preokupasaun hosi sé
maka akompaña prosesu ne'e", nia hatete.
Kandidatu
hosi Partidu Republikanu, Donald Trump, manán ona eleisaun prezidensial sira
iha Estadus Unidus iha loron-tersa ne'e, tuir hosi rezultadu provizóriu dahuluk
sira ne'ebé maka fó sai iha loron-kuarta ne'e.
Iha
nia diskursu vitória nian, Trump afirma ona katak sei sai Prezidente ba ema
amerikanu tomak no hatete ona katak hanesan oras hodi ema norte-amerikanu sira kura
kanek sira hodi haketak malu no hamutuk fali "nu'udar povu unidu
ida".
SAPO
TL ho Lusa
Sem comentários:
Enviar um comentário