FAAN DIGNIDADE NASAUN – opiniaun, editorial Jornal Nacional

Biro Investigasaun Korupsaun Singapura (CPIB) nian kaptura membru Federasaun Futebol Timor Leste (F-FTL) nebe komete eskandalu Jogus SEA Games 2015 entre Timor Leste kontra Malaysia.

Suspeitu, Orlando Mendes nudar diretor tekniku FFTL ho ninia kolega timor oan ida seluk tan no sidadaun Indonesia nian rua nee CIPIB kaptura tamba sai bandar hodi manobra golu iha jogu nebe halao iha Sabadu 30/5 iha Bisham Estadium.

Rezultadu investigasaun fo sai katak iha suspeitu nain hat nee deklara katak sira husu duni ba jogador sira balu husi Timor Leste atu joga ho performas estadar atu nunee Malyasia bele manan jogu kontra Timor Leste.

Rezultadu ikus jogu entre Timor Leste versu Malaysia nee, Malaysia konsega manan duni Timor Leste 1 a 0. Osan nebe asegura iha eskandalu nee ho valor 15.000 Dollar Singapura.

Publiku iha Timor Leste agradese ba biro investigasaun korpsaun Singapura nian nebe detekta eskandalu nee, se lae povu Timor nee konsidera derota nebe ekipa Timor Leste hetan nee buat normal ida tamba Timor Leste nunka hatudu prestasaun diak iha jogu SEA Games liu modalidade futebol nian.

Ho akontesimentu hanesan nee hatudu katak ekipa futebol Timor Leste nian joga iha Sea Games nee ekipa husi nasaun seluk mos reseu maibe tekniku sira, ofisiais sira mak halo manobra hodi nunee Timor Leste sempre lakon.

Ho akontesimentu nee governu liu husi Sekretario Estadu Juventude Desportu atu bele Kontrola ona ekipa Timor Leste nian nebe sempre tuir jogus internasional nee tamba keta halo ba durante nee Timor Leste lakon nee kauza husi eskandalu sira hanesan nee.

Durante nee governu aloka osan kuaze miliaun ida Dollar Amerikanu ba Federasaun Futebol Timor Leste atu bele utilize ba inventu internasional sira hanesan nee maibe tamba sa eskandalu sira nee akontese?.

Karik osan sira nee FFTL la aloka ba ofisiais sira nebe akompanha Timor Leste nebe partisipa iha jogu Sea Games hodi nunee ofiaisais sira mos hakarak buka osan adisional ba ninia an rasik.

Akontesimentu nee publiku Timor kondena makaas, organizasaun Juventude resistensia 12 Novembru, tamba konsidera aktu nee nudar traisaun ba rai doben ida nee.

Nunee mos parte FFTL nian mos la tolera aktu nebe ninia membru halo iha Sea Games tan nee deside sei hasai diretor teknika nee depois de julgamentu iha Singapura,fila fali mai Timor Leste.

Akontesimentu nee nudar lisaun ida, no mos loke FFTL nia matan atu kontrola ona ho Rigorozu ninia ofisiais sira, nunee mos Governu, liu husi Sekretaria Estado Juventuede no Desportu atu bele mos audit utlizasaun osan estadu nian nebe aloka ba FFTL atu bele iha transperensia ezekusaun osan Estadu.

Agora supeitu diretor Tekniku FFTL nee mos laos pecat deit maibe kuandu fila fali mai timor tenki prosesa mos tamba konsidera faan dignidade nasaun nian. *

Jornal Nacional, editorial