Povu Timor-Leste Lutu Nasional – Estadu Rekoñese Luta La Sama

Ministru Estadu Koordenadór Asuntu Sosiál no Ministru Edukasaun, Saudozu Fernando La Sama de Araújo, hakotu iis (mate) iha Tersa (2/6), tuku 8:30 Oras Timor Leste (OTL), iha Hospitál Nacional Guido Valadares (HNGV), Díli, tanba hetan moras Hemoragia Intracerepral (pendarahan otak).

Relasiona ho La Sama nia mate Konsellu Ministrus, dekreta kedas iha sorumutuk extraordináriu, Lutu Nasional, ne’ebé sei hala’o to’o tuku 24.00, loron 5, fulan-juñu, no deside ona atu propoin ba Prezidente Repúblika atu fó  kondekorasaun ho títulu póstumu.

Governu hato’o ninia pezar ne’ebé kle’an tebes tanba lakon ninia membru ida no durante sorumutuk ne’e,  hakmatek durante minutu 1 hodi fó homenajen ba matebian.

Governu mós dekreta loron ne’e hasa’e bandeira meia haste (Setengah tiang). Katak, Durante períodu Lutu Nasionál nian, Bandeira Nasionál sei hasa’e to’o meia haste de’it, iha edifísiu administrasaun públiku nian hotu-hotu, inklui Palasiu Prezidensial Nicolau Lobato, embaixadas no konsuladu sira ka reprezentasaun sira seluk Estadu nian iha rai liur, nune’e mós iha embarkasaun sira Estadu nian.

Entretantu prosesu funebre ba matebian Fernando La Sama de Araújo sei hala’o iha dia 6, iha Jardim dos Herois, Metinaro, Dili.

Eis Preziente Parlamentu Nasional iha kuartu Governu konstitusional ne’e, hakotu iis iha sala intensive Care Unit (ICU) tanba sofre moras hemorojia iha parte kakutak.

Matebian Fernando La Sama hetan insidente mais ou menus iha tuku 10:00 OTL, banhira hala’o diskursu kona-ba asuntu edukasaun nian iha salaun administrasaun Munisípiu Covalima.

Bainhira diskursu seidauk remata kondisaun saúde Governante ne’e la permite, tanba ne’e evakua kedas ba hospital referral Covalima hodi halo primeiru intervensaun durante oras balun obrigada tenke evakua mai banku Urjensia Hospital Nacional Guido valadares Iha tuku 14:00 OTL ho aviaun MAF.

Entretantu tuir Diretor Ezekutivu Hospital Nasional Guido Valadares (HNGV) José Antonio Guteres hatete, Ministru Estadu Kordenador Asuntu Social no Ministru Edukasaun Fernando ‘La sama’ de Araújo to’o iha Banku Urjensia HNGV mais ou menus tuku 2:00 OTL ho kondisaun kritiku.

Nia esplika katak, bainhira tama iha banku urjensia HNGV   La Sama nia kondisaun krítiku tiha ona (kesadaraan menurun).

Nia haktuir tan katak, tanba ne’e medikus espesialista sira halo teste USG (ekokardio grama ) ba nia fuan maibe la detekta problema ida signifika nia fuan normal. Tanba ne’e kontinua halo teste CT scan maka medikus sira deskobre katak hemorolojia (Pendarahan) iha parte kakutak.

“Husi CT scan maka ita deskobre katak iha hemorojia (pendarahan) iha ninia kakutak, pendarahan ne’ebe maka luan teb-tebes iha kakutak, no lori kedas ba Intensive Care Unit (ICU),” haktuir José Antonio.

Nia dehan, tratamentu iha HNGV tantu iha estranjeiru la halo tratamentu ne’ebe maka aktivu, maibe halo tratamentu konservativu liu husi fo aimoruk atu labele iha presaun interkranial (tekanan dalam otak) labele meningkat.

Diretor hatutan, tanba presaun interkranial aumenta provoka herniase ka jaringan kakutak balun tun husi nia ulun ruin, hafoin halo intervensaun ida ne’e lori ba ICU medikus sira tau makina ventilador hodi suporta ninia oxigenio,suporta ninia respirasaun.

Hafoin halo intervensaun, HNGV mos halo kedas konsultasaun ba hospital sira iha estranjeiru liu husi dotor espesialista bedah saraf iha hospital Sidney ho Melbourne Australia.

“Ami haruka foto rezultadu CT scan nian ba sira haree tiha sira dehan kondisaun hanesan ne’e kritiku ami sujere lalika haruka ba, tanba haruka ba lamanan buat ida I bele iha risku seluk fali mate iha aviaun laran,” diretor haktuir medikus espesialista Australia nia liafuan.

Alende ne’e HNGV mos konsulta kedas ba medikus espesialista siloam Bali Indonesia, maibe medikus sira foti liman ba kondisaun eis Prezidente Parlamento ne’e tanba kondisaun krítiku.

“Depois kontinua konsulta ba hospital Nasional University Singapura, maibe medikus espesialista sira dehan deit 10% atu salva. Kontaktu aviaun ambulansia konsege to’o iha ne’e, ohin dader tuku 5:00 maibe to’o tuku 4:00 kondisaun ita nia ministru nian deteriora (memburuk), tensaun tun entaun lakonsege transfere.ikus mai hakotu I’is iha tuku 8:30 Otl”haktuir José Antonio ba jornalista sira iha HNGV ,Tersa (02/06).

Iha fatin hanesan, Antonio Aitahan Matak, haktuir katak, matebian Fernando La Sama ema ne’ebe mak oferese nia vida tomak iha tempu difisil, no hakotu iis iha HNGV mos tanba hetan torturasaun husi Indonesia iha tempu luta ba ukun rasik án.

“Nia (La Sama) ema ida ne’ebe maka pasiensia a’as no oferese ninia prestasaun tomak iha tempu difisil, no ao mesmo tempu ema baku, baku to’o muta raan, maibe nia kura deit ho buat ida tua maka akontese hanesan ne’e,”haktuir Antonio Aitahan Matak.

“Ha’u sente triste tanba bainhira nia atu funda RENETIL, nia sempre mai hasoru uluk ha’u no kuandu nia ba eskola iha Jakarta nia hatete hanesan ne’e, se ita iha ne’e deit ita labele domina maluk sira ne’ebe maka apoiu ba integrasaun ne’e,”dehan La Sama.

“Maibe kuandu ba Indonesia nia rain maka loke organizasaun   bele lori estudante Timor oan sira ne’ebe maka ba eskola iha Jakarta ,tanba ne’e maka nia harii RENETIL 20 de Abril iha Bali,”Aitahan Matak konta tuir.

Nia dehan tan, bainhira La Sama haruka fila karta ba resistensia, Xanana Gusmão la fo respostas karta durante fulan 6, segunda karta, Aitahan Matak maka halo duni relatoriu ida maka foin hetan respostas.

Ho triste, Antonio Aitahan Matak konta tuir tan katak, momentu nia (Aitahan Matak) rasik ba Jakarta La sama maka halo seguransa oitoan salva Aitahan Matak nia moris.

Estadu Rekoñese

Povu Timor-Leste lakon tan ninia lider politiku husi jerasaun foun ne’ebe dedika an tomak servi povu, la haree ba oras no distansia, la sura kolen no sempre simu no prontu atu hala’o kna’ar ne’ebe povu fó.

Ho espiritu, domin no komitmentu saudozu nian ne’ebe bo’ot ba povu no rai Timor Leste, mak Governu liu husi Konsellu Ministru Extraordináriu fó omenajen ba saudozu Fernando La-Sama de Araújo, tanba La-Sama mós kompañeiru da luta ida ba prosesu libertasaun nasionál rai Timor nian.

Prosesu funeral saudozu La Sama nian, sei organiza husi Ministériu Solidariedade Sosiál ho Ministériu Administrasaun Estatal hamutuk ho família saudozu Ministru Estadu Koordenadór Asuntu Sosiais no Ministru Edukasaun, Fernando La-Sama de Araújo nian.

Iha enkontru Konsellu Ministru Extraordináriu ne’e mós propoin ba Prezidente Repúblika Taur Matan Ruak hodi fó kondekorasaun ho tipu postomo ba Saudozu La-Sama.

“Saudozu La-Sama hanesan Timor-oan ne’ebé partisipa ativu iha prosesu luta libertasaun nasionál hato’o ba señor Prezidente Repúblika hodi deside tipu de kondekorasaun ho tipu de postomo no fatin funeral iha Jardim dos Herois Metinaro,”informa Primeiru Ministru Rui Maria de Araújo liu husi konferensia imprensa iha Palasiu Governu, Tersa (02/6).

Rui Araújo haktuir, durante Saudozu La Sama servisu ba rai ida ne’e, La-Sama hatudu sentidu ne’ebé diak, liu-liu durante ne’e nia haka’as an kona-ba oinsa atu hadia edukasaun. Maibé destinu mak hakotu saudozu ho ninia kolega VI Governu Konstituisionál.

“Lori povu no Governu nia naran hato’o sentidu kondolénsias ba familia tomak ho sentidu profundu pezar, tanba Timor-Leste lakon tan Timor-oan ida ne’ebé dedika nia vida tomak ba libertasaun da patria no libertasaun do povu, nia hetan moras ne’ebé fatál, enkuantu halo hela servisu,”dehan Primeiru Ministru.

Saudozu Fernando La Sama de Araújo asume ona kargu nu’udar vise Ministru Negosius Estranjeirus iha Governu Tranzitoriu, membru asembeleia konstitusaun no sai Deputadu Parlamentu Nasional iha Primeiru lejislatura.

Hafoin ne’e, sai fali Prezidenti Parlamentu Nasional iha segundu lejislatura, iha kintu Governu sai Vice Primeiru Ministru asuntu sosiais, no ikus sai Ministru Kordenador Asuntu Sosial no Ministru Edukasaun iha Sestu Governu ne’e.

La Sama hetan atakasaun iha Munisipiu Covalima, bainhira halo vizita trabalhu ba komunidade iha Munisipiu refere. Wainhira hala’o hela dialogu namanas ho profesores tensaun ataka hodi monu tu’un ba rai. Ho esforsu tomak La Sama lori kedas mai Hospital Nasional Guido Valadares (HNGV) atu hetan tratamentu intentivu.

Maibé esforsu ne’ebé doutor sira halo durante kalan ida iha HNGV, la hetan rezultadu pozitivu, tanba Maromak nia hakarak bo’ot liu povu Timor.

Iha fatin hanesan Vise Ministra Saúde, Maria do Céo reforsa katak, doutor espesialista sira iha HNGV la konsege salva La Sama nia vida, tanba moras sofre korasaun inklui pendarahan otak (Hemoragia Intracerepral).

Nia hatutan, moras tensaun ne’e, perigu tebes bainhira akontese ba ema nia vida, tanba bainhira aviaun lori La Sama mai to’o Dili, kondisaun tama iha faze kritiku no Governu buka solusaun hodi kontaktu aviaun atu tula ba Singapura, maibé lakonsege.

Nia informa katak, La Sama evakua mai Dili iha tuku 14:00 no Ministeriu Saúde simu nia iha Aeroportu internasional Nicolau Lobato hodi lori kedas ba HNGV.

“Ho esforsu maximu ekipa Ministeriu Saúde nian ho ekipa ida husi Nasional University Hospital Singapura mós to’o mai hodi fó apoiu, maibé la konsege atu salva nia vida,”dehan nia.

Tuir ajenda ne’ebé fo sai fo husi Vise Ministru Solidariedade Sosial, Miguel Manetelu katak, prosesu funebre ba mate isin saudozu Fernando La Sama de Araújo, primeiru mate isin La Sama sai husi nia hela fatin Ailok laran, mai iha Sede RENETIL Farol, depois sai husi sede RENETIL sei ba iha Sede Partido Democrático (PD) iha Colmera, nune’e sai fali husi sede PD mate isin sei ba latan iha edifisiu Ministeriu Edukasaun Matadouru, nune’e sai fali husi Matadouru sei ba iha Parlamentu Nasional hanesan fatin ikus ona tanba matebian hanesan eis Prezidente Parlamentu Nasional segundu lejislativu, hafoin ida ne’e mak lori mate isin ba halót iha Jardim dos Herois Metinaro, Dili.eby/cos

Jornal Nacional