GOVERNU BANDU FUMA IHA KARETA LARAN

Governu fó ona orientasaun ba Polisia Nasional Timor-Leste (PNTL) atu kontrola no fó sansaun ba ema sira ne’ebé fuma iha transporte públiku laran, tanba fó efeitu ladiak ba ema barak nia saúde.

Primeiru Ministru (PM), Rui Maria de Araújo dehan, ema ne’ebé hakarak fuma tenke la’o ain deit, labele tanba deit ema ida nia gostu, halo terus ema barak iha transporte públiku ne’e nia laran.

“Favor ida, Komandante Jeral PNTL, fó instrusaun ba membru atu kontrola, Taxi, Microlet, Auto Carro sira ne’e, labele iha ema fuma iha laran tan. Se haree motorista to’o fali sira ne’ebé tu’ur iha kareta laran fuma, Polisia Trânzitu tenkE interven hodi fó sansaun ou kastigu,”orienta PM Rui Araújo ba PNTL, iha selebrasaun loron mundial saúde Sabado (30/5) iha Jardin Largo Lesidere.

Rui Araújo mós fó orientasaun ba Ministériu Saúde (MS) atu aviza ba eskola sira, hahú husi Ensino Pre-Secundária, Secundária to’o Universidade sira atu labele fuma iha ambiente eskola nian, tanba eskola la’os fatin atu hanorin malu ba fuma.

“Lei mak aban bainrua mak proibiu idade fuma ninian, maibé agora dadauk hanesan instituisaun Estadu nian ne’ebé responsabiliza iha área edukasaun ninian, tenke fó avizu ba eskolas hot-hotu no universidades hot-hotu labele fuma, se hakarak fuma, ba fuma iha estrada ka ba fuma iha uma,” dehan Rui Araújo.

Alende ne’e, Rui Araújo mós orienta Ministériu Saúde atu komesa identifika ona ministériu sira ne’ebé livre ona husi tabaku, atu tinan oin Governu fó premiu ba sira, tanba sira ne’e hanesan ezemplu diak ida instituisaun Estadu hotu.

Nia mós fó apelu ba setór privadu sira katak, kuandu hakarak fa’an nafatin tabaku, tenke halo ho maneira ne’ebé fair. Signifika, la presiza halo reklame ka promosaun iha dalan ibun ka media sira kona-ba tabaku.

Iha parte seluk, Vise Ministra Saúde, Ana Isabel afirma, komesa tinan ida ne’e, Governu sei estabelese servisu hapara tabaku iha komunidade sira, nune’e bele redus númeru konsumu tabaku iha Timor-Leste.

Tanba maske iha Timor Leste seidauk iha manufaktura ba tabaku, maibe tabaku oi-oin mak tama mai. Tanba ne’e Governu hanoin ona atu integra programa kontrolu tabaku hodi kontrola komersiu illegal tabaku, hasa’e taxa importasaun tabaku, inklui halo kampaña ba públiku kona ba efeitu husi tabaku ne’e rasik ba saúde.

MS mos produs ona lei kontrolu tabaku ne’ebe agora submete ona ba Conselho dos Ministros hodi hetan aprovasaun.

Tuir dadus ne’ebe MS fo sai katak, prevelezu ema uza tabaku atual mak ema sira ne’ebe idade 15 to’o 49, husi idade ne’e, mane 89,5% no feto 4,5% kategoria fumador.

“Dadus ne’e hatudu katak, populasaun iha Timor-Leste, mane ne’ebe fumador ho idade 15 a’as liu iha Sudeste Aziatiku, tanba alunus ida husi alunu nain 10 fasil atu hetan no fuma sigaru ho marka oi-oin,” dehan Vise Ministra Saúde, Ana Isabel.

Governu mos bandu atu fatin públiku labele tau espanduk tabaku nian no la autoriza labarik kiik sira fa’an tabaku ka ema fa’an sigaru ba labarik kiikoan sira.

“Ha’u husu ba komunidade sira atu labele haruka sira nia oan ba sosa sigaru, kuandu hakarak fuma, ba sosa rasik,”

Iha selebrasaun ne’e, MS fó rekoñesementu espesial ida ba setór privadu 28, ne’ebé ho sira nia vontade rasik, estabelese ona área livre tabaku iha ida-idak nia servisu fatin. Ho sira nia esforsu ne’e bele sai ezemplu diak ba sidadaun tomak.tap

Jornal Nacional