LAKON FIGURA NE’EBÉ LASURA KOLEN

Prezidenti Partidu istóriku FRETILIN, Francisco Guterres ‘Lu-Olo’ Lasama nia mate ne’e tristeza boot ba povu Timor Leste (TL), tanba lakon figura ida ne’ebé mak nunka sura ninia kolen hodi servisu Estadu no nasaun.

“Ami hakarak atu hato’o katak, Timor Leste lakon tan ninia dirijenti ida ne’ebé prontu kontribui maka’as teb-tebes iha tempu ne’ebé nia halo polítika hodi mai to’o agora nia fó nia kontribuisaun barak. Maibé nia distiñu mai koa iha dalan klaran hodi labele tutan tan”, hateten Lu-Olo ho triste ba Jornalista sira, hafoin hato’o Sentidu Kondolénsias ba Prezidente Partidu FRETILIN hato’o kondelensias ba saudozu Ministru Estadu Koordenador Asuntu Sosiál no Ministru Edukasaun (ME) Fernando ‘Lasama de Arújo, nia mate iha mortuáriu Hospital Nacional Guido Valadares, Tersa feira (02/06).

Prezensa Prezidenti partidu istóriku FRETILIN nu’udar mós eis Prezidenti Assembleia Konstituente, Prezidenti Parlamentu Nasionál (PN) Primeiru no Segundu Lejislatura ne’e, akompaiña husi nia espoza, Cidália Lopes Nobre Mouzinho Guterres, hamutuk ho nia kamarada sira balun to’o iha resintu HNGV mais ou menus tuku 09:30, hodi fó homenajen ba saudozu Lasama iha mortuáriu.

Hafoin fó tiha homenajen kuaze meia hora hanesan ne’e, Lu-Olo ba Jornalista sira, lori ninia naran pesoal, familia no mós lori naran Partidu FRETILIN nian hato’o sentidu kondolensias ne’ebé klean ba Lasama.

No ho abertamente Lu-Olo dehan, nu’udar adversáriu polítiku ne’e la’o tuir ida-idak nia dalan, maibé momentu ida ne’e, iha sentimentu todan teb-tebes, tanba TL tenke lakon ninia kuadru di’ak ida, figura di’ak ida no mós belun, amigu no maun alin di’ak ida.

“Ha’u hanoin saudozu Ministru Estadu Koordenadór Asuntu Sosiál no Ministru Edukasaun (ME) Fernando ‘Lasama’ de Araújo ema polítiku ne’ebé perante tuir ida-idak nia dalan, maibé momentu ida agora dadauk ne’e, sai hanesan sentimentu todan teb-tebes tanba ita lakon ita nia kuadru ida, ita nia belun ida, amigu ida no ita nia maun no alin ida”, Lu-Olo fundamenta ho matan-ben nakonu.

Iha parte seluk, Vise Prezidenti Partidu Demokrátiku (PD), Samuel Mendonça, povu TL em jerál no espesífiku PD lakon nia figura di’ak jerasaun foun nian.

“Ami lakon ami nia figura di’ak ida hanesan maun Lasama”, hateten Samuel Mendonça iha HNGV.

Nune’e mós materestu 12 de Novembru Felismeno da Silva Fereira, hateten katak, em termus politika Lasama nu’udar figura ida Timor nian, maibé em termus familia, iha relasaun primus irmauns, maibé tristeza boot ba nia tanba lakon figura hanesan Lasama.

“Em termus familia Lasama ha’u nia primu maibé em termus rezisténsia ami sempre kontaktu malu, maibé ohin loron ami lakon figura di’ak ida husi povu Timor ne’e leet”, hateten Felismino da Silva ba Jornal Nacional Diário wainhira hein hela saudozu nia isin mate iha mortuáriu HNGV.

Nia dehan, figura hanesan Lasama ne’e preparadu sai lideransa jerasaun foun nian iha future, tanba alénde nia prepara foinsa’e sira, nia mós preparadu ninia-an rasik, no iha kompetensia atu sai lider ida.

Nune’e mós membrus estrutura PD nivé médiu, José Manuel Maniquin hateten katak, PD lakon figura ba future ninia hanesan Lasama.

“Ita koalia konaba PD, ita koalia konaba Lasama. Tanba Lasama identik ona ho PD, PD identik ho Lasama”, hateten José Maniquin.

José Maniquin mós rekoñese ho figura Lasama bele akumula ema hotu, mesmu iha problema maibé buat hotu bele la’o di’ak fila fali.

“Ne’ebé kuandu ema temi Lasama, ita nia hanoin ne’e mós halai kedas mós ba Partidu Demokrátiku. Ne’ebé ami hanesan estrutura nivel médiu nian, ami sente katak, ami lakon ami nia maun, ami nia figura di’ak ida”, José Maniquin haktuir ho triste.dac

Jornal Nacional