Alin Istilozu, F-FDTL sei Pecat Maun hosi F-FDTL

METINARO - Vise Xefe  Estadu Maior Jenerál F-FDTL, Brigadeiru Jenerál Filomeno da Paixão de Jesus hatete, Membru FALINTIL-Forsa Defeza Timor Leste (F-FDTL) ne’ebé maka tiru membru PNTL na’in ida iha Munisípiu  Lautem, Sesta (28/10) kalan, komandu sei hasai tiha hosi Instituisaun F-FDTL.

Filomeno hatete, nia sei koa’lia ho Xefe  Estadu Maior Jenerál, Maijor Jenerál Lere Anan Timor atu labele tolera ba membru sira ne’ebé maka komete krime.

“Prosesu la’o  hotu komandu sei hola medidas para sira seluk labele repete tan, ha’u propoin ba jenerál duni sai sira ne’ebé hemu tua lanu halo problema, sei entrega  desijaun ikus ba Jenerál,” dehan Filomeno ba Jornalista iha Metinaro, Kinta, (03/11).

Nia hatutan, sira ne’ebé halo problema balun iha hela seksaun Justisa nia liman no balun iha Justisa konjunta F-FDTL ho PNTL nia liman balun fali iha prijaun Polísia Militar (PM) Quintal boot.

Iha fatin seluk Komandante Jeral PNTL Komisariu Julio da Costa Hornay dehan, los duni kazu ne’e akontese duni maibé atuasaun imidiata la iha problema ne’ebé maka grave.

“Polísia ka’er tiha ita nia soldadu ne’e tau tiha iha sela maka ita nia Polísia Militar ba foti primeiru ba foti uluk tiha soldadu ida lokraik mosu tan problema ida ita asegura tiha membru ne’e PM to’o iha ne’eba entrega  ho di’ak, sira nia komandante to’o iha ne’e ba dehan ita nia soldadu ida rua malandru ita halo duni atuasaun hanesan ne’e,” dehan Julio ba Jornalista iha Kuartel Jeral PNTL, Kaikoli, Segunda, (31/10).

Nia hatutan, konaba prosesu disiplinar nian ne’e oinsa orsida komandu F-FDTL maka hatene.

Kazu ne’e akontese iha Sesta (28/10) kalan bainhira membru PNTL eskuadra Lospalos kaptura no prende membru F-FDTL na’in ida ho nia maluk na’in tolu ne’ebé halo barullu iha eskuadra Lospalos nia oin.

Membru F-FDTL ne’e ba ho kareta forsa nian ho arma kompleitu tama ba eskuadra polísia hodi husu nia motor  no polísia bolu didiak nia sai ba foti nia kilat se kedas ba komandante eskuadra nia ren tos maka membru PNTL seluk haree hodi ba hadau maka nia tiru sae kona iha plafon uma nian. (way)

Timor Post