MP Ezije Mandadu Detensaun, Tribunal Fó Tan Loron 8 ba Emilia

DILI: Ministériu Públiku (MP) ezije Tribunal Distrital Dili (TDD) atu altera medida koasaun ne’ebé molok ne’e hasai ba arguida Emilia Pires hodi hala'o viajen ba rai li'ur no hasai mandadu detensaun ba eis Ministra Finansas ne’e. Enkuantu tribunal deside hodi fo tan prazu loron 8 ba arguida atu legaliza ninia dokumentus.

Prokuradoria Angelina Saldanha ne’ebé reprezenta MP, liu husi julgamentu Sesta (04/11), husu tribunal atu hasai mandadu detensaun tanba arguida hatama ona pedidu barbarak ne’ebé la ho justifikasaun klaru no loloos.

“Ne’e maneira ida atu halai se’es-an husi tribunal, tanba dezloka ba fatin-fatin. Husu tribunal altera medida koasaun no hasai mandadu detensaun,” dehan Prokuradoria Angelina iha tribunal.

Iha fatin hanesan, Juiz Prosesu José Maria de Araujo hatete, TDD fó tan prazu lorn 8 ba arguida Emilia Pires atu legaliza dokumentus kona-ba tratamentu saúde iha Australia ne’ebé molok ne’e arguida hatama ona.

“Tribunal haree liu ba kondisaun saúde arguida Emilia Pires. Tanba ne’e mak tribunal fó prazu ba nia atu legaliza iha 8 dias, komesa aban. Tribunal adia fali (julgamentu) ba loron 16 tuku 4 lokraik,” nia hatete.

Atu legaliza dokumentus ne’e, nia dehan, signifika arguida tenke haruka rezultadu operasaun ba nia ain ne’ebé tuir planu sei hala’o iha loron 5 Novembru ne’e.

“Defeza rasik mós promete ona katak se karik operasaun ne’e iha duni, sira tenke junta hotu. Maibé buat ne’e seidauk iha, tanba aban (5/11) mak foin halo operasuan, tanba ne’e mak husu atu legaliza tuir kodigu penal artigu 137, pontu 2 ne’e,” nia dehan.

Entretantu, Advogadu privadu Emilia Pires, José Camoes informa, arguida la konsege fó justifikasaun antes tanba iha loron 22 Outubru mak mediku sira konfirma loloos kona-ba loron atu halo operasaun ba nia ain.

Maski nune’e, nia afirma, durante ne’e ninia kliente sempre fó justifikasaun ba tribunal, tan ne’e nia la aseita ho ezijensia husi MP atu hasai mandadu detensaun ba arguida Emilia.

Advogadu ne’e promete ba tribunal katak, bainhira mediku sira hahú halo operasaun ba arguida no MP presiza fotografia ruma, arguida sei haruka mai hodi nune’e bele haforsa liu tan karta pedidu ne’ebé molok ne’e haruka ona ba tribunal.

Ola Timor – Chay - Editór: Tellukoro

Foto: Arguida eis Ministra Finansas Emilia Pires. (FOTO/opinitimor.blogspot.com)

Notisia ligadu iha Ola Timor

Juiz: Tribunal La Autoriza Emilia Trata Saúde iha Australia

Advogadu: Emilia Pires La Fila

Arguida Emilia sei iha Australia, TDD Fó tan Loron 5