Suku 313 Avansa ba Eleisaun Segunda Volta

DILI - Diretór Jerál Desentralizasaun Administrativa, Ministériu Administrasaun Estatal (MAE), Abilio José Caitano hatete, hamutuk suku 313 iha teritóriu Timor laran maka sei hala’o fali eleisaun ba segundu ronde tanba iha rezultadu eleisaun dahuluk maioria  la priense kritériu.

Iha rezultadu eleisaun primeiru nian maioria  hatudu impata no balun la priense pursente ne’ebé iha. Tanba ne’e tenke kontinua ba eleisaun segundu ronde.

“Ami sei halo fali tan preparasaun ba sengundu ronde ne’ebé governu deside ona sei realiza iha loron 13 fulan ne’e,” dehan Abilio iha Salaun MAE, Segunda, (31/10).

Abilio hatete, governu rekoñese katak iha mós fallansu  balun iha prosesu eleisaun sukus tinan ne’e, mais la afeita prosesu ne’e tomak so em termus de atrazu ou la tuir orariu hanesan. Iha aldeia balun la konsege realiza eleisaun segundu ronde tuir oráriu tanba de’it komunidade rasil la marka ona prezensa iha parte lorokraik.

Maibé  fallansu  hirak ne’ebé mósu sira bele resolve hodi adia ba loron seluk ne’ebé sei lansa liu hosi akta.

Prosesu Eleitoral Lideransa Komunitaria tinan 2016, hala’o nia preparasaun desde fulan Jullu to’o Outobru bazeia ba lein Numeru 9/2016, Lei dos sukus data 8  de Jullu prosesu preparativus ne’e liu hosi sosializasaun ba lei refere, rekrutamentu ba meja Assembleia no fórmasaun.

Suku 23 iha Aileu tama Segundu Ronde

Iha parte seluk, Eleisaun ba lideransa komunitáriu ne’ebé maka halao iha munisípiu  Aileu partisipa hosi povu suku tolu nulu resin ida, maibé suku 23 maka tama ba segundu ronde.

“Suku rua nulu resin ida maka tama ba segunda volta no suku ualu manan maioria , ne’ebé maka ita sei realiza iha loron 13 fulan Novembru tinan 2016,”dehan Koordenadór STAE Munisípiu  Aileu, Marcelino Sousa ba Diáriu Timor Post via telefone, Kinta (03/11).

Nia hatete, iha postu administrativu Remexio iha suku ualu, maibé suku tolu hanesan Suku Liurai, Faturasa no Hatu—Oho no suku ne’ebé tama ba segunda volta maka hanesan, suku Açu—Mau, Fahisoi, Fadabloko, Maumeta no Tulatakeu.  

Marcelino Sousa haktuir, iha Munisípiu  Aileu iha 31 suku I sentru 35 aldeia ne’ebé maka utiliza ba sentru votasaun.

“Total ita nia votantes hamutuk 28. 867, nia prosesu ne’e agora dadaun ita tenke ser hili Xefe  Suku, Xefe  Aldeia, delegadus no delegada, pois ida ne’e xefe  suku eleitu maka hili fali lia na’in, xefe juventude feto no mane,” nia haktuir.

Kontajen iha sentru votasaun konta uluk xefe  aldaia no delegadus no delegadas, depois sei ba halo apuramentu iha suku, depois iha suku xefe  suku sira halo de’it ona relatoriu ba postu administrativu hafoin maka deside iha ne’eba.

Bainhira kandidatu na’in rua maka votus hanesan hakarak ka lakohi tenke hakat ba segunda volta, tanba sistema ne’ebé maka ita uza, sistema maoria apsuluta.

Nune’e  mós iha sorin seluk Xefe  suku atual nomós kandidatura ba xefe  suku ba tinan 2016 to’o 2023, Adão Fernandes hatete, eleisaun suku iha tinan 2016 ne’e, kandidatura ba Xefe  Suku Açu—Mau  hamutuk ema na’in ualu mane neen no feto rua.

Kandidatu na’in ualu ne’e hanesan, Adão Fernandes, Alarico Fernandes, Clarissa de Andrade Soares, Domingos Soares, Manuel Frederico, Maria da C. Soares, Miguel da C. Mendonça no Pinto Alves.

Maibé ikus mai povu Suku Açu—Maun kontinua nafatin fó votus atus tolu sanulu resin sia ba Eis Xefe  Suku Açu—Mau, Adão Fernandes hodi lidera suku Açu—Mau hahu hosi tinan 2016 to’o 2023.

Suku Açu—Mau iha iha Sentru Votasaun tolu hanesan, Sentru Votasaun primeiru Lerolisa, Sentru Votasaun segundu iha sede Suku Açu—Mau no Sentru Votasaun terseiru iha Eskola Pre—Eskolar Remexio Tuan, ho total eleitores hamutuk atus sia rua nulu hosi sentru votasaun tolu.

Antes ne’e Primeiru Ministru (PM), Rui Maria de Araújo, afirma, sidadaun hotu iha direitu atu foti desizaun ba vota no la vota, maibé ba sira ne’ebé la vota ne’e lakon ona oportunidade.

“Lei la obriga katak, votasaun ne’e la’ós obrigatóriu, mas hanesan sidadaun ita la vota, ita lakon oportunidade atu ejerse direitu ida ne’ebé atu hili líderes sira ne’ebé moris hamutuk iha komunidade sira nia le’et,” PM Rui ba jornalista sira hafoin tuir votasaun iha sentru votasaun, suku Acadiruhun, Aldeia Bedik, Postu Admistrativu Na’in  Feto, Munisípiu  Dili, Sábadu, (29/10).

Xefe Governu hatutan, lei sira iha loke ona dalan ba eleisaun, sidadaun hotu-hotu lolo’os  tenke partisipa iha votasaun ne’e, tanba lideres komunitáriu   sira mak lor-loron servisu ho komuniade atu bele muda situasaun iha komunidade nia leet iha nivel aldeia no suku sira.

“Ha’u nia hanoin prosesu eleisaun suku ida agora iha inovasaun lubuk ida hosi prosesu kandidatura to’o prosesu eleisaun, se ita haré  didi’ak kandidatura nakloke maka’as, ita haré  kandidatu barak mak halo sira nia kampaña programa ba komunidade sira”hatete PM Rui. (rio/fer)

Timor Post