CPLP Prepara Estudu Viabilidade no Sustentabilidade

DÍLI, (ANTIL) - Organizasaun Comunidade dos Países da Língua Portuguesa (CPLP) prepara estudu viabilidade no sustentabilidade ba proposta alterasaun objetivu no regulamentu “Prémio José Aparecido de Oliveira” ba estadu membru sira, hodi hetan bolsa estudu ba mestradu, doutoramentu peskiza no investigasaun.

Tuir nota informativa ne’ebé ANTIL asesu, Sesta (04/11), katak, preparasaun ba estudu viabilidade ne’e realiza iha Brasília, Segunda (31/10) no Tersa (1/11)  tinan ne’e iha ámbitu konferénsia XI xefe estadu no governu organizasaun luzofona ne’e.

Bolsa ida-ne’e nu’udar inisitiva husi embaixadór Murade Murargy, bainhira nu’udar Sekretáriu Ezekutivu CPLP, atu kontribui ba formasaun pós-graduada ba rekursu umanu ne’ebé ho kualifikasaun aas, husi estadu membru sira, hodi asume kna’ar nu’udar atór ba prosesu transformasaun nasionál, dezenvolvimentu ekonómiku no kontinua iha “Gloria de Servir” liuhusi defeza, valorizasaun no promosaun prinsípiu, valór no objetivu CPLP nian.

Tuir rezolusaun Simeira Brasília, proposta ne’e, tuir mai sei submete ba iha Komité Konsertasaun Permanente ,hodi hetan apresiasaun husi Konsellu Ministru.

Iha apresiasaun ne’e, prémiu hanaran José Aparecido de Oliveira nu’udar simbolu, hodi hatudu kbiit komunidade nian, ninia virtude liliu diversidade no respeitu malu, husi dook, besik no husi língua.

Prémiu ida ne’e, kria ho objetivu atu hanoin hikas aktu ne’ebé embaixadór José Aparecido de Oliveira halo, hodi hamosu CPLP hodi konverte mehi sai realidade povu, nasaun dalen portugés nian no namkari iha kontinente haat hodi sai autór ba futuru.

Kandidatu ba distinsaun prémiu José Aparecido de Oliveira ne’e mak estadu membru no observadór sira ne’ebé asosiadu no konsultivu ba CPLP nian. Prémiu ne’e mós bele fó ba pesoál no instituisaun ne’ebé ninia kontributu ba iha prinsípiu, valór no objetivu CPLP nian no konsideradu relevante ho CPLP ne’e. Nune’e mós, bele fó ba autór estudu sira no traballu investigasaun sira iha ámbitu prinsípiu, valór no objetivu CPLP nian.

Istorikamente, prémiu ne’e, dahuluk iha tinan 2012, entrega ona ba Antigu Prezidente Brazileiru, Luiz Inácio Lula da Silva, durante IX konferénsia xefe estadu no governu CPLP iha Maputu.

Daruak, iha tinan 2014, prémiu ne’e mós atribui ona ba Kay Rala Xanana Gusmão no igreja katolika Timor, personalidade no instituisaun-Sentru Episkopál Timor-Leste ne’ebé halo prezervasaun ba identidade kulturál povu timoroan nian iha luta ba indepedénsia Timor-Leste, iha defeza valór no prínsipiu CPLP no promosaun no difuzaun língua portugeza iha konferénsia X xefe estadu no governu CPLP nian.

Datoluk, iha tinan 2016, prémiu José Aparecido de Oliveira ne’e fó ba antigu Prezidente Repúblika Portugeza, Jorge Fernando Branco de Sampaio, Eis-sekretáriu Ezekutivu Komisaun Ekonómika Nasaun Unida nian ba Áfrika, Carlos Lopes nomós, Diplomata Kareira Brazil no Reprezentante Dahuluk no reprezentante Permanente CPLP, embaixadór, Lauro Barbosa da Silva Moreira. (jornalista:Rafy Belo/Editór: Otelio Ote)

LEE LIU IHA ANTIL