DOM VIRGÍLIO: PROFESSORES LA’OS DEIT TRANSMITI CIÊNCIA

Bispo Diocese Dili, Dom Virgilio do Carmo da Silva SDB hatete,  professores la’os deit atu transmiti ciência, maibe oinsa fo valor ba eskola para bele hasaé kualidade edukasaun.

“Professor ida la’os deit atu transmiti ciensia, maibe valores ka prinsipiu hanesan ema anonimu, tanba eskola maka fatin ne’ebe atu aprende valores sira, eskola mak fatin sira ne’ebe aprende valor, tanba ne’e bainhira koalia konaba valor professor ou professora ida nian, la’os deit koalia konaba profisaun ida, maibe hanoin katak vokasau ida mos,”Dom Virgilio, hatete iha Igreja Katedral-Dili, Segunda (10/10/2016) wainhira prezide missa agradesimentu loron Mundial Professores iha loron 5 fulan Outobru semana kotuk.

Dom Virgilio hatutan, profesaun professor la’os buat ida ne’ebe fasil,  maibe profesaun ida ne’ebe difisil basa  edukasaun ne’ebe diak fasilita moris liu husi esperensia interativa, edukasaun ne’ebe maka diak eduka ba moris ne’ebe diak ne’ebe nakonu ho dazafius oi-oin.

”Kna’ar profesores nian la’os fasil maibe ida ne’e hanesan vokasaun ida ne’ebe nai Maromak fo ba ema balun,”haklean Bispo Dili.

Tanba ne’e liu husi missa agradesimentu ne’e Dom Virgilio hateten, husi selebrasaun refere atu refleta fila fali knar lubuk ne’ebe maka durante ne’e  Ministeriu Edukasaun inklui professores sira hala’o entermus ciensia nian.

“Parabens ba professores sira hotu ne’ebé ohin selebra loron professores nian, loron furak ida ne’e merese duni atu selebra eukaristia santa ida hodi agradese ba Maromak ba buat diak hotu ne’ebé ita simu nu’udar ema individu nune’é mós instituisaun, la’os deit atu agradese maibé iha oportunidade atu sukat kualidade servisu ne’ebé ita iha, hodi servi ita nia rai liu husi edukasaun,”haklaken Bispu Diocese Dili.

Selebrasaun ne’e mos atu  hanoin konaba obra mizerikordia nian iha area edukasaun nian ne’ebe nudar professor no professora saida mak atu  halo iha  tinan mizerikordia ne’e nudar professor no professora sai laran  luak  ba labarik hotu iha teritoria Timor laran tomak  hodi bele hetan kadeira no meja hodi tur atu estuda.

Alende presija fatin ne’ebe diak atu tur hodi estuda estudante sira mos iha direitu ba edukasaun spiritual liu husi edukasaun, tanba  edukasaun prosesu ida ne’ebe envolve ita nia isin, neon, fuan no espiritu.

Professores hala’o knar tenke ho Domin

Primeira Dama (PD), Isabel Ferreira husu ba professores sira hotu atu hala’o sira nia knar nudar edukador ho domin ba ninia alunus sira.

“Primeiru parabens ba professores hotu iha mundu tomak liu-liu ba Timoroan,  tanba profesaun professor nudar previlejiadu  iha mundu hahu husi familia, sosiedade nomos nasaun. Husu ba professor sira atu hala’o sira nia profesaun domin atu prepara jerasaun foun liu-liu ita nia joven sira ke presija estuda ho didiak, ita presija akompanhamentu ida husi professores sira atu ajuda mos komunika ho inan  aman sira  para ita nia edukasaun iha Timor bele sai edukasaun ida ne’ebe diak, la’os hatudu ho titulu,”haktuir Primeira Dama.

Tuir Isabel Ferreira, edukador ne’ebe diak la’os hatudu deit tituliu, maibe tenki fo akompanhamentu ne’ebe diak ba estudante sira, TL bele iha joven futuru nasaun nian ne’ebe mak diak no iha valor.

“Edukasaun ida ne’ebe diak lao’s hatudu  ho titulu sidadaun Timor sira nian deit, maibe prepara mos  estudante sira ne’ebe ho  fuan diak atu bele sai sidadaun ne’ebe diak, sai sarani  ne’ebe diak iha nasaun TL,”enkoraja Primeira Dama.

Inan ba nasaun ne’e mos hatete, durante ne’e entidades liu-liu professores sira preokupa  ba sira  nia moris ne’ebe ho konsiderasaun ladun hetan atensaun, maibe nudar edukador tenke nafatin ho pasensia.

“Timor oan ita hotu komprende ita nia situasaun nasaun nian, estadu iha prioridade barak, tanba ne’e  hanesan Timoroan eduakasaun ita hotu nian professor sira hotu mai ita hotu pasensia ituan laos Governu  la fo atensaun ou haluhan maibe husi parte ME komesa halo ona planu hodi hare’e kona ba problema sira ne’e,”tenik nia. Ola

Jornal Nacional