Probabilidade Veteranu iha F-FDTL Sei Pasa Ba Forsa Rezerva

DILI, (ANTIL) - Maijór Jenerál Lere Anan Timur iha hanoin ida katak veteranu iha FALINTIL-Forsa Defeza Timor-Leste (F-FDTL) ne´ebé infrenta difikuldade barak no saúde la permite probabilidade bele pasa ba forsa rezerva.

“Jenerál Lere hanoin katak, lei admite karik, sira ne’ebé ho idade 55 ba leten ne’e bele sai hanesan forsa reserva de’it. Nia bele ba rezerva maibé simu osan nafatin. Kuandu nasaun hasoru krize ou funu, instituisaun bele haruka sira fila ba instituisaun hodi defende soberania nasaun. Maibé, sé iha idade 60 ba leten, sira ba ona reforma. Kuandu ba ona reforma, nia ba ona sivíl totalmente. Iha funu ka krize ruma mosu sei labele bolu nia fila,” Brigadeiru Jenerál F-FDTL, Filomeno Paixão dehan ba jornalista sira iha Palásiu Prezidénsia Repúblika, Bairu-Pite, Dili, Kuarta (12/10), hafoin ramata inkontru ho Xefe Estadu Taur Matan Ruak.

Tanba ne’e, Filomeno haktuir, agora sira halo hela estudu no análize halo nusa maka haruka veteranu sira  balun ba reforma no balun ba rezerva. Antes foti desizaun, nia hatutan, sei konsulta ho veteranu sira para bele hili hakarak sai forsa rezerva ou reforma.

Kona-ba sorumutu ho Prezidente Repúblika, Brigadeiru Jenerál informa, hato´o relatóriu kona-ba atividade kontidianas iha F-FDTL hahú hosi Kuartel Jenerál to’o iha komponente sira. “Ami ko’alia kona-ba dezenvolvimentu Komponente Naval liu-liu ko’alia kona-ba reparasaun bárkus ne’ebé ajuda hosi Xina. Ró patrollamentu hosi Xina ne´e komesa halo ona patrollamentu,” nia haktuir.

Ró patrollamentu ajuda hosi Korea ne’ebé para iha Behau, nia hatán, seidauk bele halo operasaun tanba sei át hela. Nia afirma Governu liuhusi Ministériu Defeza hameno ró ne´e nia pesa iha Korea maibé karun oituan, tanba ne’e husu fali kuotasaun foun ba Indonézia ne´ebé ho kualidade di’ak no presu baratu. Ninia kustu Ministériu Defeza maka hatene.

“Ró hirak ne’e ki’ik tanba ne’e labele halo operasaun to’o iha kosta súl. Realmente, presiza ró boot duni,” Brigadeiru Jenerál tenik. (Jornalista: Xisto Freitas / Editor: Gantry Meilana)

Foto: Brigadeiru Jenerál F-FDTL, Filomeno Paixão ko'alia ba jornalista sira iha Palásiu Prezidénsia Repúblika. Foto ANTIL/Xisto Freitas