PERTAMINA LA HASA’E FOLIN MINA

Manajer Marketing Pertamina Internasional Indonesia iha Timor-Leste (TL), Daniel, hatete, maske Autoridade Nacional Petroleu (ANP) taka Portu Tibar, Pertamina Indonesia sei la hasa’e folin mina hanesan públiku kestiona.

“Portu Tibar bele taka, ami sei la hasa’e folin mina iha Timor Leste. Maibe ami bazeia ba folin mina Internasional. Ne’ebe mina folin Gazolina 85 sentavus no Gazoel 59 sentavus,”esplika Daniel ba jornalista iha servisu fatin, Pertamina Praia dos Coqueiros-Dili, Segunda (10/10).

Nia hatutan, wainhira mina internasional folin sa’e, Pertamina sei hasa’e mina folin, maibe merkadu internasional hatún, Pertamina mós hatún mina nia folin.

“Foin lalais  ne’e ami hatún mina folin,  gazolin 87 sentavus,  maibe foin lalais  iha 23 Setembru ne’e ami hatún ba 85 sentavus por litru ba   gazoel 59 sentavus, la  iha mudansa desde  fulan Agostu.   Ne’e duni ami  ne’e  transparante ba mina nian folin, ami mós fo sai iha jornal, depois fo sai iha website www.pitsa.tl kona-ba mina nia folin,”dehan Daniel.

ANP oras ne’e taka provizoria Portu Tibar fulan tolu nia laran hodi halo konstruksaun   ba Portu Tibar foun.

Maske nune’e antes ne’e, Diretor Kompañia Ruvic Lda, Rui Castro, hatete, uluk iha kompañia lobuk ida mak hatama mina mai Timor, ho ida ne’e mak Pertamina mós la halimar ho folin mina. Maibe karik Portu Tibar la hala’o operasaun tanba atu halo konstrusaun foun fali ba Portu Tibar ne’e mak Pertamina sei hasa’e kedan folin mina.

“Agora ita bo’ot sira bele ba check, semana hira nia laran ne’e Portu Tibar la hala’o operasaun hodi hatún mina iha ne’eba, entaun Pertamina hasa’e kedan mina nia folin mak hanesan Gazoel ho presu 59 no Gazolina ho presu 85,”esplika Diretor Kompañia Ruvic Lda,  Rui Castro, ba jornalista iha nia knaar fatin Bidau, Sesta (07/10).

Rui Castro dehan, ANP mós fo hatene ona ba sira katak, Portu Tibar sei taka durante fulan tolu nia laran, tanba  ne’e kompañia ne’ebé mak fornese mina labele ba hatún ona iha fatin ne’eba.

Ho problema ida ne’e nia mós husu ba Governu para kria kondisaun alternativa hanesan Portu Tibar tenki iha molok hala’o konstrusaun ba Portu Tibar foun, atu nune’e bele iha mós alternativa hodi hatama mina.avi

Jornal Nacional