PREZIDENTI PN BUDU KARTA LEVANTAMENTU IMUNIDADE

Reprezentante povu nian iha uma fukun Parlamentu Nasional ‘dun’ nia prezidenti Aderito Hugo da Costa, budu karta lavantamentu imunidade ba deputado ho membu Governu ne’ebe mak hetan ona akuzasaun husi parte kompetente.

Membru PN husi Bankada FRETILIN, Osorio Florindo, liu sesaun plenaria, Segunda (1010/2016), kestiona maka’as prosesu levantamentu imunidade ne’ebe hirak ne’ebe tribunal haruka uluk mai atu halo levantamentu imunidade sai ikus fali no hirak ne’ebe ikus sai fali uluk.

Reprezentante povu ne’e husu ba Prezidente PN katak, karta ba lavantamentu imunidade sira ne’e labele rai, kuandu tama ona despaxa kedas, ba se-se deit, atu hasai ka lae mai mak deskute hamutuk iha plenaria.

Iha fatin hanesan, deputada bankada CNRT, Maria Rosa Camara “Bisoi”, esklarese katak, notifikasaun husi Tribunal relasiona ho hasai imundade ba se deit tenki hasai uluk mak ida ne’e, labele ida ne’ebe ikus mak uluk fali.

“CNRT mak agora dadauk iha ne’e (red-parlamentu), membru partidu husi estrutura nasional maka sala bolu malu koalia iha bankada, tanba sai iha jornal sira no sai polemika bo-boot ona,” hateten Bisoi.

Deputada Maria Fatima Belo, hanesan mos membru Komisaun G ba asuntus Etika, dehan katak, iha semana kotuk simu duni karta notifikasaun tolu.

“Karta notifikasaun tolu ne’e maka ida ba Ministru Turismu, Arte no Kultura (MTAK), Francisco Kalbuadi Lay, seluk deputado Jaco no mos karta ida husi polisia, karta rua hanesan deputado Jaco nian no karta ida husi Polisia mai iha tempu resesu ne’ebe atu hatan mos prazu ne’ebe ami halo fali karta id aba prezidente PN hodi nune’e haruka fali karta ba tribunal atu halo karta foun fali,” esplika deputada Maria.

Hatan ba preukupasaun ne’e, Prezidente Aderito Hugu da Costa, klarifika katak, pedidu husi tribunal ba levantamentu imunidade, hetan progresu hotu iha komisaun G, ne’ebe trata asuntu Etika.

“Laiha ida maka tau iha hau nia gabeta, iha loron 15 Maior 2016 hau sai Prezidente PN, laiha karta ida mak hau tau iha gabeta laran, pedidu rua mai iha resesu labele adianta, ne’ebe halo korespondensia informa fali ba zuis ne’ebe kaer kazu ka sira ne’ebe halo investigasaun atu re ajenda, tanba pedidu mai iha tempu resesu, maibe nafatin korespondensia halo iha komisaun Etika, iha karta rua mak hetan progresu iha komisaun Etika, laiha tan pedidu seluk ne’ebe mak tau iha hau nia gabeta,” klarifika Prezidente PN.

Nia esplika tan katak, tuir regras pedidu husi tribunal ka instituisaun sira ne’ebe mak relevante ho investigasaun tama mai iha gabineti Prezidente no prezidente baixa ba komisaun kompetente atu halo prosesu sira ne’e, maibe kuandu pedidu.

Aderito husu ba deputado sira katak, karik rona pedidu mai husi Tribunal maka nia tau iha gabeta bele dehan sai katak pedidu saida no kona ba akuzasau saida, atu nune’e labele kria rumoris.

“Desizaun ba levantamentu imunidade ba se deit iha plenaria, la’os iha prezidente parlmentu nia liman,”dehan nia.

Relasiona ho karta husi tribunal nian ba husu PN atu halo levantamentu imunudade, iha plenaria segunda (10/10/2016) mosu diskusaun maka’as entre deputado sira ho prezidente PN rasik. mia

Jornal Nacional