Iha
loron-tersa ne'e Xina kritika ona intervensaun hosi Estadus Unidus Amérika iha
Ázia, iha tempu ne'ebé iha fali tensaun sira entre poténsia rua ne'e, tanba
konflitu teritorial sira iha Tasi Súl Xina nian no ho península koreanu.
Durante
diskursu ne'ebé hala'o iha fórum dahitu hosi defeza rejional Xiangshan, iha
Pekin, ministru Defeza xinés, Chang Wanguan, halo ona krítika oioin kona-bá
avansu hosi norte-amerikanu iha rejiaun.
"Nasaun
balun buka superioridade militar absolutu, hametin nafatin sira nia aliansa
militar sira, no buka seguransa kompletu ho baze iha seguransa hosi nasaun sira
seluk nian", afirma ona hosi Chang.
Washington
haruka nafatin ró sira funu nian hodi hakbesik ba illa artifisial sira ne'ebé
Pekin harii iha Tasi Súl Xina nian, no konkorda ona hodi instala sistema ida
defeza antimisil nian iha Koreia-Súl, hodi hatán ba teste nuklear sira ne'ebé
hala'o hosi Pyongyang.
Durante
administrasaun Barack Obama nian, EUA hametin nia prezensa iha Ázia, liuhosi
envolvimentu militar no ekonómiku boot ida, ne'ebé hamosu aprensaun iha Pekin,
ne'ebé haree hanesan tentativa ida hodi kontrola nia poder ne'ebé aumenta.
Xina
reivindika soberania tomak kona-ba Tasi Súl Xina nian, ho baze hosi liña ida
ne'ebé mosu iha mapa xinés sira nian hahú hosi tinan 1940, no investe iha
operasaun boot sira iha zona ne'e, hodi transforma fatuk-ruin sira ba portu,
pista aterajen sira no ba infraestrutura sira seluk.
Vietnam,
Filipina, Malázia ho Taiwan mós reivindika parte ida hosi zona ne'e, hodi
hamosu opiniaun teritorial ne'ebé la hanesan ho Xina.
Iha
fulan-Jullu liubá, Tribunal Permanente Arbitrajen nian (TPA), ho sede iha Haia,
konklui ona katak laiha baze legal ba Pekin hodi reklama direitu istóriku sira
iha "liña ho trasu sia" nia laran.
Governu
xinés afirma ona katak "la aseita no la rekoñese" desizaun ne'e.
Antigu
primeiru-ministru australian Robert Hawke, ne'ebé halo parte mós iha fórum,
aviza ona katak bainhira kazu disputa sira ne'e la jere ho dalan di'ak, bele
sai hanesan "pontu ida konflitu nian entre EUA ho Xina".
"Disputa
sira ne'e iha potensial hodi perturba orden rejional tomak", nia afirma.
SAPO
TL ho Lusa
Sem comentários:
Enviar um comentário