Preokupa Psijolojia Polisia Armadu

DILI - Primeira Dama Isabel Ferreira preokupadu ho psikolojia membru Polísia Nasionál Timor Leste (PNTL) balun molok kaer kilat.

Tanba tuir Primeira Dama nia haree, iha TL polísia bele lori kilat ba uma, maibé iha nasaun seluk, lae.

Kultura ida lori kilat ba uma halo Inan ba Nasaun ne’e deskonfia membru PNTL balun bele halo fali atividade seluk.

Maibé Primeira Dama la esplika detallu sasukat ne’ebé indika membru PNTL sira nia psikolojia.

“Iha ita nia rai, ita haree polísia sira hatudu sira nia komportamentu di’ak, ita kompara ho país sira seluk, ita nian di’ak liu ona, mais ita labele kontente ho buat ne’ebé agora la’o, mais ita tenke fó hanoin ba malu i sira hanesan Timoroan, ita presiza fó hanoin ba sira no ajuda sira ba buat ne’ebé ladi’ak, tanba ne’e ha’u karak hamutuk ho mídia, sosiedade sivíl sira hotu nu’udar Timoroan, ita husu ba komandu PNTL no ministériu interior para atu halo teste psikolojia ba PNTL sira ne’ebé atu lori ka kaer kilat, ne’e esperiénsia país sira seluk hanesan ne’e,” dehan Primeira Dama ba jornalista sira iha Ministériu Edukasaun Vila-Verde Dili, Tersa (11/10).

Nia  dehan, polísia kaer kilat tenke halo duni teste psikolojia ba sira, labele lori kilat ka kaer kilat ka lae, tanba ne’e tenke halo teste ba sira kuandu bele ona maka foin bele fó kilat ba sira.

“Ita labele fó de’it sira sai ona polísia bele lori kilat, ne’e labele i kilat só lori iha servisu, depois  hotu servisu tenke rai kilat iha servisu fatin, ne’e esperiénsia ne’ebé ha’u haree iha Singapura, Nova Zelándia no Austrália sira halo hanesan ne’e, kilat nunka lori ba uma, entaun ita husu ba ita nia autoridade sira atu halo nune’e du ké simples presiza vontade polítika atu hanesan ne’e iha ita nia nasaun ne’e, Primeira Dama dehan.

Primeira Dama afirma, vontade ne’e tenke mai hosi autoridade másimu, nune’e ezemplu ba membru sira.(fer)

Timor Post