LABELE INTERVEIN JUDISIAL…!!!

Jornal Nacional, editorial

Parlamentu Nacional dadaun nee iha prosesu halo apresiasaun politika levantamentu imunidade ba Ministru Turizmu Arte no Kultura, Francisco Kalbuadi Lay nebe deskonfia komete krime angariasaun fundos ba partido CNRT iha tinan 2012 nebe ohin loron prosesa ona iha Tribunal Distrital Dili.

Atu hasai ka lahasai imunidade membru governu ida nian hodi submete ba prosesu justisa iha tribunal, nee depende ba Parlamentu Nasional nian tamba orgaun lejislativa nee mak iha kompetensia tomak hodi suspende imunidade membru governu nian.

Kazu nebe deskonfia Kalbuadi Lay ho Jancinto Rigoberto komete iha tinan 2012 nebe konsidera preskreve (out of date ka expire) tiha ona tamba besik tinan lima ona la prosesa maibe tribunal foin mak loke fila fali kazu nee.

Lahatene durante nee tribunal halo saida deit? haluha tiha ka? Tamba buat ruma nebe publiku labele hatene? Tamba politiku nain sira mos dun tribunal iha intrese? Presizia esplikazaun.

“CNRT sei defende kazu ne’e to’o rohan, aktu ida mak ami sei defende tuir baze legal iha parlamentu ne’e autoriza ka lae, tanba tuir baze legal ne’ebe iha la iha dalan para autoriza, tanba tuir Konstituisaun artigu 1 katak Estado de dereito ne’ebe ita hotu serbisu tuir konstituisaun haruka, la’os tuir ida-idak nia gostu,” Arão Noe.

Los duni senhor deputado, atu defende ka la defende kazu nee direitu deputado sira nian, li-liu deputado sira bankada CNRT iha Parlamentu Nasional tamba kazu nee mesmo konaba membru CNRT nian ida ka rua maibe naran partido nian mos sai boot no foer.

Agora hakarak ka lakohi, tribunal ajenda julgamentu nian ba kazu nee iha 25 Outubro nee maibe atu julga membru governu ida, tenki hasai uluk imunidade nebe membru governu nee iha.

Tan nee atu hasai ka lahasai imunidade Francisco Kalbuadi nian nee depende ba plenaria atu deside, CNRT labele apriori fo sai deklarasaun hodi hatudu ba publiku prezedente katak politiku sira intervein hela sistema judisiariu nian.

Kazu Francisco Kalbuadi Lay ho Jacinto Rigoberto nian nee dilema ida Parlamento Nasional konaba levantamentu imunidade membru governu nian tamba Parlamentu lasuspende imunidade mak Tribunal mos labele halo julgamentu.

Durante nee tribunal infrenta problema prosesu julgamentu ba kazu sira nebe membru governu sira komete. Besik tinan rua Tribunal husu parlamentu nasional atu hasai imundiade eis Presidente Parlamentu Nasional Vicente Guterres tuir prosesu iha tribunal  konaba kazu sosa kareta ba deputado segundo lejislatura.

To’o ohin loron tribunal lahasai imunidade Vicente Guterres nian tan nee kazu nebe alega ba eis Presidente PN nee kontinua budu hela iha Tribunal Distrital Dili. Lahatene karik Vicente Guterres husi partido CNRT? Ka tamba kompañeru iha Parlamentu tan nee lakohi hasai imunidade? Lahatene los.

Kazu kontra membru CNRT nian ida seidauk hotu mosu tan ona kazu seluk nebe komete mos membru CNRT nian, kazu Kalbuadi ho Rigoberto nian. Maske seidauk hatene kulpado ka lae maibe laiha serteze desizaun tribunal nian publiku bele konsidera partido CNRT mais korupto.

Durante nee publiku fo apresiasaun boot ba Presidente partido CNRT, Kayrala Xanana Gusmão. Lider ida nebe sai ezemplar, mesmo asumi hela pasta  nudar Primeiru Ministru maibe tribunal bolu hodi presta deklarasaun ba tribunal, Maun Boot, fo dokumentu ba tribunal, lider jerasaun tuan sira hanesan nee mak dehan lider.

Laos sai lider aproveita ita nia lideransa nee hodi defende an, defende intrese hodi la repeita prinsipiu país estadu direto demoratiku nee. Lei ba ema kiik no kiak deit, ema boot sira nee la vale ba sira.

CNRT bele defende mate an los ninia membru nain tolu nee ba tribunal hodi justifika lia los duke defende taka lia los ba publiku nebe ikus mai tuir los inocente maibe publiku konsdera fali kulpadu.*